Ich Johans. hern Wolfger suon zuo den zeiten Richter in Oedenburch .. Und die gesworn Purger mitsampt der gemein auch da selbz . Geben zeiner gedenknuezz disen brief . allen . flaischkern von der Stat ze Wyenn . und allen den laeuten . di da arbaitend . di strazz aus den Landen des Hochgeporn Fuersten hern Albrecht hertzogen ze Oesterreich . ze Steyr . und ze Karnden . untz gen Oedenburch . daz di Maut an dem Crautzhof . ze Oedenburch von alter her also chomen ist . daz si geben schueln . von einem swaeren tuoch von Dorn . sechs Wyenner phenning . von einem ringren von Dorn vier phenning . von einem Langen von Koln . sechs phenning . von einem Eyperschen tuoch Neun phenning . von einem Langen von Leven Neun phenning . von einem Kurzen von Leven sechs phenning . von einem von Auch vier phenning . von einem Langen von Mentz vier phenning . von einem Polanischen tuoch zwen phenning . von einem Loden oder von einem grawen tuoch drey helbling . und von den tuochen allen schuln si nicht mer geben denn vorgeschriben stet . Wir haben auch den vorgenanten Laeuten verhaizzen . daz nieman der zwischen uns ist gesezzen . ze Oedenburch . oder ueber den wir ze gebieten haben si zwischen der Leyta und Oedenburch aufhaben und bechuemmern schol weder ir leib noch ir guot . denn wa ein ieglicher wandlung geschicht da schol si werden gericht Geschicht si ze wyenn si schol auch da werden gericht Geschicht si ze Oedenburch . si schol auch da werden gericht und niendert anderswa . Auch haben wir den vorgenanten Lauten verhaizzen . welhi under in in unserr vorgenanten Stat ze Oedenburch . dez Herytagez und dez Mitichens, und di tag baid untz an di nacht . in einem kauf stend . den schol nieman der zwischen uns ist gesezzen . in den kauf treten . untz daz si da von gend . si chauffen umb gest oder umb gesezzen Laeut zwischen uns ze Oedenburch . Daz dise red stet sey und unzerbrochen beleib . geben wir vorgenanten purgern in Oedenburch disen brief zem Lemptigen gezeug und zeiner offen Urchund versigelt . mit unserm Stat anhangenden Insigel. Der brief ist geben nach Cristez geburd dreuzehenhunder Jar und in dem zwai und funfzigistem Jar . des nochsten phintztages vor sant Michels tag.

Source Fulltext: Peter Peusquens