Ich Andre zu den zeiten schaffer des Erbern herren . hern Reinprechts von Walsse von Enns . Vergich offenleichen an disem brief . Daz fuer mich chomen . do ich saz an offem Gericht . der erber man her Niclas der Wurffel . purger ze wienne und chlagt mit vursprechen auf Jacobs weingarten des Sluezzler von Neunburch unde der do leit ze Obern Chritzendorf . in dem grozzen wintternest . des funf virtail ist und haizzet daz wintternest ze nest Niclas weingarten des Lukchner . umb sechs phunt wienner phenning versezzens Purchrechts und umb alle die zwispilde die mit recht dar auf ertailt sint als verr daz ich im mit recht poten dar auf gab . die zwen erber man Jorigen den Vintzer von Chritzendorf und Jansen den Freysinger die habent auch dar umb gesagt mit irn treun vor rechtem Gericht als si ze recht solten daz si den vorgenanten weingarten mit sambt den umbsezzen haben beschaut und geschatzt . daz er so tewr nicht en ist als daz versezzen purchrecht und die zwispilde die mit recht dar auf ertailt sint und wart gevragt waz recht wer do gevil dem vorgenanten hern Niclasen dem Wuerffel do mit vrag und mit urtail er solt mier mein recht geben daz hat er getan Und solt ich in des obgenanten weingarten gewaltich machen und an die gewer setzen daz han ich auch getan furbaz ledichleichen und vreyleichen ze haben . und allen seinen frumen do mit ze schaffen verchauffen versetzen . und geben swem er welle an allen ierrsal Unde des ze urchunde gib ich im disen brief versigilt mit meinem insigil Der brief ist geben Nach christs geburde dreutzehen hundert iar dar nach in dem zway und funftzigistem iar des nasten Sunntags vor aller Heiligen Tag.

Source Fulltext: Peter Peusquens