Ich Maister Suezzel. der Jud ze Wienne . Vergich und Tuen chunt alle den . die disen brief lesent, oder hoerent lesen. die nu lebent und hernach chuenftich sinde . Daz ich mit meiner Erben gutem willen, und gunst, mit verdachtem muet, zue der zeit . do ich ez wol getuen mochte. und mit dez Perchherren hant dez Erbern Gaestleichen prueder . prueder Ernsteins dez Ochsen . zue den zeiten Comitewr . dez Hauses . datz dem Taewtschen Haus ze Wienne . verchauft han . zwen weingarten . der ainer leit in dem Chaeswassersgraben , dez ain Jeuch ist . ze naechst Chuenrats weingarten . dez Goltstains . da man von dem Egenanten weingarten . alle iar dient . den Gaestlichen pruedern . datz dem Taeutschen Haus ze Wienne, viertzich wienner phenning ze perchrecht . und nicht mer . So leit der ander weingarten . ze chlaytzing . dez ein halbs jeuch ist . zenaechst hern Perchtolts chinder weingarten dez Pollen . da man auch alle iar von dient . hintz dem Taeutschen haus . ze wienne . fuemf und viertzich wienner phenning ze perchrecht . und drey helbling . ze voytrecht . und nicht mer. Und sint auch mir Maister Suezzlein dem Juden . die egenanten zwen weingarten baidew fuer hauptguet . und fuer schaden verstanden . von dem Erbern herren hern Chuenraden von Hakkenberch . und von seiner hausvrowen vrowen Margreten . und von irn Erben . die mir sew . mit ein ander . mit gesampter hant . da fuer versatzt habent . zue der zeit do si ez ze recht wol getuen mochten . alz der satzbrif sagt . der mir von etsue . dar umb gegeben ist. Die vorgenanten zwen weingarten . han ich Recht und redleichen verchauft und geben . mit alle den nutzen und rechten . alz Sew mir . mit meinen satzbrif . baydew fuer hauptguet . und fuer schaden verstanden sint . alz vor geschriben stet . und alz wir auch dew selben zwen weingarten unversprochenlich in Perchrechts gewer her pracht han . umb drew und sibentzich phunt wienner phenningen . der ich gar und gaentzleich verricht und gewert bin . Dem Erbern Herren . hern Jacoben dem Pollen . zue den zeiten chappellan . der chappellen . in der purger Rathaus ze Wienne . hern Otten Haim stiftung . der die selben zwen weingarten Gechauft hat . von den phenningen . die Hainreich . weiln hern Ulreichs dez Haller von Nuerenberch . ze Wienn diener und verweser . hinder im lazzen hat zue einer Ewigen Messe . da von ze Widem . und die auch von Erbern Laewten . den der selb Hainreich sein geschaeft enphohlen hat , die selben Ewigen Messe, in die vorgenanten chappellen gewidempt und gestift habent . ewichleich dar inne ze beleiben . und die auch dem Erbern priester hern Petrein . ze verwesen dar inne , verlihen ist zue seinen tagen . Und bin auch ich Maister Suezzel der Jud . und meine Erben unverschaidenlich . der vorgenanten zwaw weingarten dez Egenanten hern Jacobs dez Pollen . und aller seiner nach chomen . und irer egenanten chappellen . an der Ewigen Mezze stat . Recht gewern und scherm fuer alle ansprach . alz purchrechts recht ist . und dez Landez recht ze Oesterreich . alz auch dez Hertzogen scherm brief . sagt . der in . zue dem vorgenanten unserm satzbrif . in ir gewalt . durch pezzer sicherhait gegeben ist . Waer aber daz Si fuerbaz mit Recht , an den selben zwain weingarten . icht chriegs oder ansprach gewunnen . von wem daz war . daz sueln wir in alles aus richten und wider cheren . an allen iren schaden . Und sueln auch Si daz haben auf uns . unverschaidenlich . und auf allem unserm guet , daz wir haben in dem Lande ze Oesterreich . oder swo wir ez haben . wir sein lebentich oder tode . Und swenn auf die selben zwen weingarten also chrieg chomente . So sueln si uns mit einer gewizzen . den satzbrief . und dez Hertzogen schermbrief leihen . das wir uns da mit Retten . und dar nach sueln wir in die hin wider geben . Tuent si des nicht . so sueln wir in chains scherms noch wider cherens gebunden sein . Und daz diser chauf fuerbaz also stat . und unzerbrochen beleibe . und wand ich selber nicht aygens insigils han . dar umb gib ich In . disen brief . zu einer Ewigen vestnung . diser sach versigilt . mit dez vorgenanten Hauses Insigil . datz dem Taeutschen Haus ze Wienne . und mit der Erbern Herren Insigiln . hern Hainreichs von Hakkenberch . hern Jansen vom Clemens. und mit dez Erbern Rueter Insigil . hern Cholmans von Hakkenberch . und mit hern Hainreichs Insigil des Wuerffels . zu den zeiten purgermaister . ze Wienne . die diser sach zeugen sint mit irn Insigiln . Der brief ist geben ze Wienne , nach Christo gebuerde dreutzehen hundert iar . dar nach in dem drew und fumftzgistem iar . dez naechsten phintztags nach sant Peternellen Tage. Der gruntdinst ist mit kawff von den Tewtschen Herren kommen an dy . N. Eybenstainer zw Nusdorf.

Source Fulltext: Peter Peusquens