Wir Albrecht von Gots gnaden. Hertzog ze Oesterreich ze Steyr und ze Kernden. Tuen chund. umb die zwen weingarten, der ainer genant ist der Chlaitzinger, der ander, der Gerloser, und ist gelegen in dem Chaeswazzer graben ze Nidern Suffring, die Michel selig der Wurfel, von Wienn, Margreten, weilent seiner housvrowen, die nû Chunraten von Hakenberg hat, geben und gemacht het, und die maister Suezzlein, unserm Juden daselbes ze Wienn, vervallen sind an dem gelt, so im dieselben, Chunrat von Hakenberg, und Margret sein housvrowen gelten solten, nach den briefen, die der vorgenant Jud, von in darumb het . Daz der erber priester Jacob der Poll, chaplan der chapell ze Ottenhaim in dem rathaus datz Wienn. die obgenanten weingarten, von dem egenanten Juden, zu derselben seiner chapellen ze Ottenhaim chouft hat zu ainer ewigen mess, als der choufbrief sait, den der obgenant Jud, daruber geben hat, und sein wir, dez, derselben chapellen ze Ottenhaim, scherm, in aller der weis, als die obgenanten brief sagent, damit die egenanten weingarten, dem oft genanten Juden, vervallen sind, mit urchund ditz briefs. Geben ze Wienn, an mêntag, vor sand Veites tag . Nach Christs gepurt, drewtzehen hundert jar, darnach in dem drew und fumftzkisten jar. Albertus pincerna janitor

Source Fulltext: Peter Peusquens