Ich Jacob der Phafsteter , und mein Erben Vergehen offenlichen an disem brief. umb den weingarten gelegen ze Nidern Sufring, dez ein Jeuch ist . ze naechst dem weingarten der weiln hern Reinharts dez Zaunruden gewesen ist , dar auf Sluemel der Jud Lesirs Sun chrieg getan hat . Jacoben dem Zwayphunt und seiner Hausvrown vron Agnesen , der daz vorgenant Jeuch weingarten ist, umb ettleich Gelt, da fuer Im der selb weingart . weiln verchuembert waz , alz ich ez in mein Register geschriben het , und den ich auch dez Gelts fuer si verricht und gewert han, von dez chriegs wegen . den ich an dem selben weingarten. dez ich Rechter perchherre bin ze stifften und ze stoern, gehabt han . baydew von den Juden und auch von In . von dez vorgenanten meines Registers wegen . und . dar umb so haben wir uns gegegen (sic) Jacoben dem zwayphunt . und gegen seiner Hausvrown vron Agnesen und gegen irn Erben mit unsern trewn verlubt und verpunden , also swaz si von dem Egenanten Sluemlein dem Juden oder von seinen Erben , an dem vorgenanten weingarten chriegs an get , daz wir In daz fuer si auz richten suln , an alle ir Mue und an allen irn schaden , Und suln auch si die selben ausrichtigunge haben, auf uns unverschaidenlichen und auf alle unserm Gut, daz wir haben in dem Lande ze Oesterreich wir sein lebentich oder tode, Und dez ze urchunde so gib ich In disen brief versigilten mit meinem Insigil . und mit hern Hainreichs Insigil dez Wurffels zue den zeiten puergermeister ze Wienn der diser Sache zeug ist mit seinem Insigil. Diser brief ist geben ze Wienn nach Christes Gepurde dreutzehen hundert iar dar nach in dem drew und fuemftzgisten iar an sant Veyts Tage.

Source Fulltext: Peter Peusquens, mit Verwendung: Schuster, Stadtrechtsbuch 141 no H.