Ich Jans zue den zeiten Chapplan. der Ewigen Messe. auf dem Alter sant Johans Baptiste . und sant Johans ewangeliste . in der Gaestleichen Vrowen Chloster . datz sant Marein Magdalen vor Schotten Tor ze Wienne vergich offenleich an disem brief. Daz mich Hainreich der Maeusel. und sein hausvrowe vrowe Gedraut . verricht und gewert habent . vier phunt wienner phenninge . ein gantzs jar dienstes . der vier phunt geltes . die ich han. auf ein weingarten. gelegen niderthalben Suefringen in dem Sunnperch . Und waer auch daz. daz ich abgienge. e daz die vier phunt dienstes auz chaemen . waere denne daz. daz si umb den selben dienst icht ansprach gewunnen. swaz si des schaden nement . des suln si denne bechoemen von allem meinem Guet . daz ich hinder mir lazze. swie so daz Genant ist . Und des zue einem uerchunde Gib ich in disen brief versigilt mit meinem Insigil . und mit hern Jansen Insigil des Minngangs . der der vorgenanten meiner Messe Lehenherre ist. der diser sache Gezeuge ist mit seinem Insigil. Diser brief ist geben nach Christes gebuert dreutzehen hundert iar . dar nach in dem fumf und fumftzgisten iar . an Unser Vrowen Tage . als si Geporn ist.

Source Fulltext: Peter Peusquens