Ich Herman. hern Hagens sun von Spilberch dem Got genad. Vergich und Tuen chunt allen den die disen brief lesent oder hoerent lesen die nu lebent und her nach chuenftig sind, daz ich nach der zeit. und uns mir vorgenantem Hermann. und meinem Pruder Hagen. baid hern Hagens Suene von Spilberch. selig. unser Ohem her Dyetreich der Flusthart. purger ze Wyenne. alle unsren Gueter. di Er von unsern wegen inn gehabt hat. gentzlich geantwurt und geben hat. mit aller meiner Erben guetem willen und gunst mit verdachtem muet und nach meiner nasten und pesten vreunt Rat. ze der zeit do ich es wol getuen macht. und mit meines Pergmaisters hant. des Erbern mans hern Albrechts des Schenchen. ze den zeiten Chelrrmaister des Edeln und hochgeparn Fuersten Hertzog Rudolfs. ze Oesterreich ze Steyr und ze Kernden. Recht und Redlihen verchauft han mein Weingarten gelegen ze Gundreinsdorf an dem Wartperg. und haizzet der Swentzguet ze naest des Flekleins Weingarten des Vischer. und do man von dem egenanten meinem Weingarten. alle jar dient dem Hertzogen in Oesterreich. drey Emmer Weins ze Perchrecht und nicht mer. Und ist auch mir obgenantem Hermann hern Hagens sun. derselbig Weingarten mit fuertzicht und mit loez an rechter taylung gevallen gegen dem obgenanten meinem Pruder Hagen do wier miteinanger getailt haben. Den vorgenanten mein Weingarten han ich Recht und Redlihen verchauft und geben mit alle den nuetzen und Rechten als ich in unversprochenlich in Perchrechtes Gewer her pracht han. und als auch er mit alter her choemen ist umb hundert phunt. und umb dreizzig phunt wienner phenning der ich gar und gentzlich verricht und gewert pin dem egenanten meinem Ohem hern Dyetreihen dem Flusthart. und sein Erben. furbas ledichleihen und vreylichen ze haben und allen iren frumen da mit ze schaffen verchauffen versetzen und geben swem si wellen an allen ierrsal. Ich pin auch unverschaiden-lihen. mitsampt mein Erben. des egenanten Weingarten. des vorgenanten Meines Ohems. hern Dyetreichs des Flustharts. und seiner Erben. oder swem Er den obgenanten Weingarten den Er umb sein aigenhafts ledigs varundguet gechauft hat. schafft oder geyt. ier Recht Gewern und Scherm fuer alle ansprach als Perchrechtes Recht ist und des Landes Recht in Oesterreich. Get in fuerbas dar an icht ab mit Recht. oder ob si mit Recht icht Chriegs, oder ansprach dar an gevunnen von swem daz weer. daz schuellen wir in alles aus richten ablegen und wider cheren. und schuellen si daz unverschaidenlich haben auf mier und auf mein Erben und auf allem uenserm Guet daz wier haben in dem Lande ze Oesterreich. wier sein lebentig oder tod. Daz diser chauf fuerbas also steet sey und untzebrochen beleib. dar ueber so gib ich fuer mich und mein Erben. In disen brief ze ainem offen uerchund. und ze einer ewigen vestigung diser sach. versigilt mit meinem Insigil. und mit des Edeln und hochgeparn Fuersten Hertzog Ruedolfs. Perchrecht Insigil in dem Lande ze Oesterreich. und mit meines Pruder. Insigil. Hagens. und mit des erbern mans Insigil hern Sigharts. des Prunner. und mit meines Ohems Insigil hern Ludweigs von Grueb di diser sach zeugen sind mit ieren Insigiln. Der brief ist Geben ze Wyenn nach Christi Gepurd drewtzehen hundert jar. dar nach in dem Newen und fumftzigistem jar. des nasten mitichens vor sand Johans Tag ze Sunnbentten.

Source Fulltext: Peter Peusquens