Ich swester Margret von Poungarten ze den zeiten Priorinn ze Tuln in dem Vrawen Chloster Prediger Ordens und aller mein Covent, vergehen und tuen chund offenlichen an dem brief, allen den, di in sehent und hoerent lesen, di nu lebent und her nach chenfftich werdent, daz wir nach uensers gnaedigen herren pot des hochgeporn Fuersten, Hertzog Ruodolffs in Oesterreich ze Steyr und ze Chernden ab zloesen, geben haben dem erbern mann Hoinrichen, dem Chitber, purger ze wienn und .. Geyseln, seiner hausfrawen und irn Erben, an zweliff phenning ain phunt wienner phenningen gelts purchrechts daz gelegen was auff irm haus ze wienn auff der Goltsmidt peym Werder Tor zwisch Chonrats Chaisers des Mentler haus und Hoinreichs des schuester haus da man uns von dem selben egenanten haus jaerlichen dient zweliff wienner phenning ze gruntrecht, daz selb egeschriben ain phunt gelts purchrechts an zweliff phenning hab wir in recht und redleichen geben abzloesen umb achtundhalb phunt wienner phenning und vier und zwaintzg phenning der wir gantz und gar verricht und gewert sein, also beschaidenlichen, daz wir si, des selben, vorgeschriben, an zweliff phenning ain phunt gelts purchrechts ledigen und vrei sagen, mit urchuend ditz briefs, daz wir daz selb egenanten phunt gelts purchrechts an zweliff phenning an si nimmer vordern wellen, und dar ueber so geb wir in disen offenn brief ze ainem waren gezeug diser sach versigelten mit uenser Priorinn anhangunden Insigil, und diser sach ist gezeug der erber man, Eberhart Albrechts sun purger ze Tuln, ze den zeiten unser schaffer mit seinem anhangundem Insigil. Der brief ist geben, ze Tuln, nach Christes gepuert dreuzehen hundert jar, dar nach in dem sehtzggisten jar an sant Uolreichs Tag.

Source Fulltext: Peter Peusquens