Ich Jans der Engelprecht und ich Kathrei sein Hausvrowe und unser Erben. Wir vergehen und Tuen chunt allen den. di den brief lesent odr hoerent lesen di nu lebent und her nach chuenftig sind. umb das phunt wienner phenning geltes puerchrechts. daz wir gehabt haben . auf dem haws gelegen auf dem Chienmarkcht an ainem tail und an dem andern tail gegen hern Ottenhaim Chappelln ueber und daz weilen hern Chuenrats in dem Tumprost selig gewesen ist und daz nu ze der zeit hern Niclas des Wurffels und seiner Erben da ist, und daz si uns auch alle jar gedient habent . von demselben irem haus . nach den sechs und dreizzich wienner phenning di si alle jar da von dienent dem erbern Richter hern Jansen dem Greiffen ze Gruntrecht . das vorgenant phunt geltes puerchrechts . hat der vorgenant her Niclas der Wuerffel und sein Erben ab dem egenanten irem haws. von uns abgeledigt und geloest mit acht phunden wienner phenningen. der seu uns gar und gentzleihen verricht und gewert habent mit solher beschaidenhait daz wir ich vorgenanter Jans der Engelprecht und ich Kathrei sein Hausvrowe noch all unser Erben und vreunt noch niempt von unser wegen . fuerbas hintz dem vorgenanten hern Niclasen dem Wuerffel noch hintz seinen Erben, noch hintz alle den di daz obgenant ier haws nach In inne habent und besiezen . weder mit briefen noch an brief noch mit dhainerlai zewgnuezze umb daz vorgenant phunt geltes puerchrechts. dhain ansprach noch vadrung nimmermer gehaben noch gebinnen sullen weder vil noch wenich . Wer aber daz dar ueber fuerbaz icht brief her fuer chemen di sagten umb daz obgenant phunt geltes puerchrechs . und daz obgenant ier haws da mit ansprechig wuerden di sullen dhain chrafft nicht enhaben . und sullen auch aller sach gegen demselben irem haws tod und ze nichtet sein. Und des ze uerchund so geben wier in den brief ze einem waren uerchund und ze einer Ewigen vestigung diser sach versigilt mit unsern Insigiln und mit des Gruntherren Insigil des erbern Richter hern Jansen des Greiffen, und mit des erbern manns Insigil hern Leupolts, des Poltz purger ze wienne, die diser sach Getzewgen sind mit iren Insigiln. Der brief ist Geben ze wienn nach Christi gepuerd drewtzehen hundert jar dar nach in dem sechtzigistem jar, des nasten mitichens nach sand Ulreichs Tag.

Source Fulltext: Peter Peusquens