Wier Cholman von goets gnaden abt des Chloster datz dem Heiligen Chreutz, und wier der Convent gemain daselbs, Wier vergehen und Tuen chunt allen den di den brief lesent oder hoerent lesen, di nu lebent und her nach chunftig sind, das wier von des newen gepoets wegen daz unser genediger herr der Edel und hochgeparn fuerst, Hertzog Ruodolff ze Osterreich ze Steier und ze Kernden, in der Stat ze Wienn umb puerchrechtes abloesung gepoten und aufge-satzt hat, Recht und Redlichen abzeloesen gegeben haben, dem erbern mann hern Niclasen, dem Wuerffel, Purger ze Wienne und seinen Erben Achtzich wienner phenning geltes puerchrechts, di wier gehabt haben auf irm paumgarten der do leit vor Stubentor ze Wienn ze nast des Ratgeben paumgarten . umb drew phunt wienner phenning an achtzich phenning, der seu uns gar und gentzlichen verricht und gewert habent, Mit der verschaidenhait, daz wier, noch all unser nach chome in dem obgenanten unserm Chloster, hintz dem egenanten hern Niclasen dem Wurffel, noch hintz seinen Erben noch hintz alle den di den obgenanten iren paumgarten nach in innhabent und besitzent, fuerbas ewichleihen weder mit briefen noch an brief noch mit dhainerlai zewgnuezz, umb di obgenanten Achtzich wienner phenning geltes purchrechts dhain ansprach noch vadrung nimermer gehaben noch gevinnen sullen weder vil noch wenich. Wer aber, daz dar ueber fuerbaz icht brief her fuer chemen di sagten umb die achtzich wienner phenning geltes puerchrechts und der egenant ier paumgarten da mit ansprechig wuerd di sullen dhain chraft nicht enhaben und sullen auch aller sach tod und ze nichte sein. Und dar ueber so geben wier in den brief ze einem offen uerchund und ze einer Ewigen vestnung diser sach versigilt mit uensern baiden anhangunden Insigiln Der brief ist geben ze Wienn nach Christi gepuerd drewtzehen hundert jar darnach in dem sechtzigistem jar des naesten vreytags nach sand Gilgen Tag.

Source Fulltext: Peter Peusquens