Ich Sibilla weilennt Thomans Vischlewters mitburger zu Wienn seligen verlassne witib Bekhenn und Thu kund offenlich mit dem brief das mir die Ersamen weisen her Paul Vinkh die zeit Ainer des Rats daselbs und Bartolome Schalautzer bed diezeit verweser der gruntbucher der Stat Wienn von dem gelt so weilent mein freundt Niclas Leb bey denselben buchern erlegt hat für die letzt Posst vir phund minus zwolf phening aufgericht und bezalt haben und Ich dieselben An stat meinselbst und Leonharts Hochenedler Auch Katherinen Michelen Mulpertzer zu Wels hawsfraw meiner geswistret der brieflichen gwelt Ich bey dem buch Erlegt hab, davon sag Ich obgenant Sibilla die Egenanten herren verweser der gruntbucher und gemainer stat Wienn und All Ir Nachkomen der obgenanten Summa und Auch des gantzen gelts so Erligt gewesen ist gentzlich frey quitt ledig und los Getrewlich und ungeverlich. Mit urkund des briefs versorgt mit der Erbern Hannsen Swartzpekhen und Hannsen Steger des hawsenschrater beder mitburger zu Wienn aigen aufgedrukhten betschaden, die Ich mit vleis darumb gebeten hab, doch In und Irn Erben on schaden darunder Ich bekhenn alles das an dembrief geschriben stet. Geben zu Wienn an Mitichen nach dem Suntag Judica in der vasten im funfzehenhundertisten jare.

Source Fulltext: Peter Peusquens