Wir Maximilian von gottes gnaden Roemischer Kunig, zuallentzeiten merer des Reichs zu Hungern Dalmatien Croatien etc kunig Ertzhertzog zu Oesterreich Hertzog zu Burgundi zu Brabannt zu Gheldern etc Grave zu Flanndern zu Tirol etc. Embieten den Ersamen weisen unnsern besonnder lieben und getrewen .n. dem Burgermaister und Rate zu Wyenn, unnsern grus und alles gut. Als sich zwischen unnsern getrewen Lawrenntzen Kaltenpruner als Gewalttrager, der Erben, Margrethen Hirspergerin und Barbara Reinhartin clager ains, und Jochaim Schott unnsers vorstmaisters unnsers Wyennerwalds, anders tayls. Recht vor Ewer erganngen und deshalben ain urtail fuer unnser Hawbtman, Stathalter und Regennten zu Wyenn zuerledigen gedingt, die aber Irer merkhlichen geschefft halben, damit Sy beladen sein, noch nicht erledigt ist, Haben wir dieselben Recht und urtail, von dato dits unnsers briefs ferrer auf viertzehen tag geschoben und angestellt. Und ist unnser maynung daz solhs yedem tayl an seinem Rechten unvergriffennlich und on schaden sein sulle, darnach wisset, Ew zurichten. Geben an Sambstag vor dem heiligen Palmtag. Anno domini etc im funftzehenhundertisten unnserer Reiche des Roemischen im funftzehenndten und des Hungrischen im Zehenndten Jarenn. Commissio domini Regis in consilio.

Source Fulltext: Peter Peusquens