Ich Chunrat der Lampflesch und mein hausvrowe vro Margret, wir paide veriehen an disem prief und tuon chunt allen den di nu lebent, und hernach chunftich sint. Daz wir haben verchauffet sechs phunt Geltes auf unsern Ekchern dem Erbarn manne hern Hainreichen dem Payr und siner hausvrowen vron Matzen umbe ahte und vierzich phunt wienner phenning, der wir reht und redeleich gewert sein. Und sint auch di vorgenanten sechs phunt Geltes gelegen an den steten alz hie benant ist. Auf dem Akcher in Dwerchlussen bei dem Teuffen Graben, zehen schilling. Enhalbe des Teuffen graben, ain halbes phunt. Im Weirochperg vierzehen schilling. Auf dem Jeus drithalbes phunt. Und sulen ouch di vorgenanten sehs phunt Geltes zwier gedienet werden aller iaerehlichen hern Hainreichen dem vorgenanten und siner haus-vrowen vron Matzen, an sand Jorgen tag, dreu phunt phennig und an sand Mychels tag dreu phunt phenning, als purchrechtes reht ist. Und swaz dem vorgenanten Hern Hainreichen und siner hausvrowen vron Matzen abgienge auf den vorgenanten sehs phunt Geltes, daz sol er und sein Hausvrowe haben auf unser hofstat, di da leit bei dem Renne-weg auf dem Jeus. Und sint auch mein Paide Aidem, Sifrit und Ruoger, und Friderich mein sun, der vorgenanten sehs phunt Geltes reht scherm fuor alle anspruch. Und sol auch der vorgenant her Hainreich und sein hausvrowe vro Matze von dem vorgenanten Guet dienen aller iaerleich fumf und zwaintzich phenning dem Erbern herren Abte Nyclasen von den Schotten, oder swer da abte ist nach im. Daz diseu rede stet beleib und unzerbrochen, des gib ich Chunrat der Lampflesch der vorgenant und mein hausvrowe vro Margret zeug und ze urchund disen prief gesigilt mit unserm Insigil. Und sint auch des Gezeug di erbern leut di hie benant sint. Daz ist der Erber unser Herre Abte Nyclas von den Schotten, der des vorgenanten Guetes rehter Purchherre ist. Her Friderich der Schotten amman. Der Tebner in der Schefstrazze. Her Ebran der amman auf der Widem. Chunrat sein aidem. Freitel auf der Widem. Gotfrid der Weitslakch. Hainreich der Taler und ander frum leut genuoch. Dieser prief ist geben ze Wienne des Maentages in der Ersten vastwochen, da von Christes Gepurt waren ergangen Dreutzehen Hundert Jar, dar nach in dem fumfzehen-den Jar.

Source Fulltext: Peter Peusquens