Ich Marquart der Zunt vergich und tun chunt an disem brief allen luten, di in sehent oder hornt lesen, di nu lebent, und hernah chunftig sint, daz ich mit samt miner hausvrowen vron Eyten, Elspeten miner tochter und ir wirtes Chunrates von Purchdorf, und ander miner erben, guetem willen und gunst, mit verdahtem muet, mit zitigem rat miner vreunt, und ouch ze der zit do ich ez wol getun mocht, verchauft han minen wingarten, der da leit an dem Staynperg ze Grinzing, des ein halbes jeuch ist, und heizzet der Ottenstainer, mit alle dem nutz und recht, als ich in, in pergrechtes gewer her pracht han, umb sechs und fumfzig march lotiges silbers wienner gewichtes, des ich recht und redlich gewert bin, dem erbern manne meister Heinrichen, pharrer von La, ze den ziten schriber und chapplan des hohen fursten hertzog Friderich von Osterrich, ledichlich und vreilich ze haben, und allen sinen frum da mit ze schaffen, verchauffen, versetzzen, und geben swem er welle, an allen irresal, und ist daz geschehen mit des perg-herren hant, probst Berhtoldes von Neunburg. Und dar uber ze einer bezzer sicherheit so setzzen wir uns, ich Marquart der Zunt, ich Chunrat von Purchdorf, und ich Wernhart von Steryn, unverscheidenlich, fur uns, und fur alle unser erben, dem vorgenanten meister Heinrichen pharrer von La, und allen den, den er den selben wingarten schaft, verchauft, oder geit, ze rechtem gewer und scherm, uber den egespro-chen wingarten, fur alle ansprach, als pergrechtes recht ist, und des Landes ze Osterrich. Swaz ouch meister Heinrichen, oder swem er den wingarten giet, mit dem rechten, an dem wingarten ab get, daz suln si haben ouf uns, und ouf unsern triwen, und ouf alle deu, und wir haben in dem Lande ze Osterrich. Dar uber ze einem ewigen gezeuge, und ze einem offen urchunde, geben wir, ich Marquart der Zunt, ich Chunrat von Purchdorf, und ich Wernhart von Steryn, disen brief versigelten mit unsern, und mit der erbern herren Insigeln, hern Wichartz von Topel, hern Herwordes von Symanning, des hertzogen (h)ofmeisters, hern Griffen, hern Chunrats des hubmeisters, hern Ulriches bei den brudern, und hern Heinriches des Chrannestes, ze den ziten richter ze Wienne, die diser sache, und ditz chauffes gezeuge sint. Wir die egenanten gezeuge, durch beider tail bet willen, haben wir unser Insigel gehangen an disen brief, ze einem offen gezeuge diser sache. Der brief ist geben ze Wienne, do von Christes geburde warn ergangen dreuzehen hundert jar, dar nah in dem fumfzehentem jar, des freitages vor dem Perichtag.

Source Fulltext: Peter Peusquens