Ich Michel der Vierdung ze den zeiten Statrichter ze Wienne vergich offenlich an dem brief das fuer mich cham in die Purgerschrann ze Wienne do ich sas an offem Gericht. Andre Jansens sun des Leinbater und chlagt mit vorsprechen auf zwai haewser und auf alle den und dar zue gehoert das weiln alles Ulreichs des Swertzer gewesen ist, und daz alles leit in der Weihenpurch ze Wyenne, ze naest Ulreichs haws des Spiezz umb drew phunt wienner phenning geltes versezzens puerchrechtes und umb alle di zwispil di mit Recht dar auf Ertailt und gegangen sind als verre uentz daz ich im mit Recht poten dar auf gab Wernharten den Zehentner und Petrein den Hendlein di zwen vorsprechen . di habent auch baid dar umb gesagt mit iren Trewen var offem Gericht als seu ze recht solden daz seu di vorgenanten zwai hawser und swas dar zue gehoeret mitsampt den umbsezzen haben beschawt und geschatzt daz seu so Tewer nicht ensind als daz versezzen Puerchrecht und di zwispil di mit Recht dar auf Ertailt und gegangen sind Und ward gevragt waz Recht wêr, do ward Ertailt und geviel auch do dem egenanten Andre Jansens sun mit vrag und mit uertail Er solt mier mein Recht geben daz hat Er getan und solt ich in der obge-nanten zwaier hawser und swas dar zue gehoert gewaltig machen und an di Gewer setzen daz han ich auch getan also, daz Er daz alles schol fuerbas ledichleihen und vreilichen haben und allen seinen frumen da mit ze schaffen verchauffen versetzen und geben swem Er welle an allen chrieg und ierrsal. Und solt ich im des mein urchund geben Und des ze uerchund so gib ich im den brief versigilt mit meinem Insigil Der brief ist geben ze Wienn nach Christi gepuerd drewtzehen hundert jar, darnach in dem sechtzigistem jar, des vreytages an sand Barbare Tag.

Source Fulltext: Peter Peusquens