Ich Chuenrat der Prentzer und ich Jacob der Reysenperger, zue den zeiten paide des Rats, der Stat ze Wyenne, wir vergehen offenleich an disem brief, daz fuer den Rat der Stat ze Wyenne chomen, die erbern Lêwt, Weychart der pheylsnitzer, an aynem tail, und Gerung der nadler, an dem anderm tayl und chriegten mit einander, umb ein mawer, zwischen ir paider hêwser, gelegen under den pheylsnitzern ze Wyenne, und paten den Rat gantzen, daz Si In gêben, zwen aus In, ze beschawern, auf die vorgenanten mawer, zwischen ir bayder hêuser, und In baidenthalben ein recht ze sprechen, wo hin die egenant mawer, ze recht gehoren solt. Des gab uns vorgenanten zwen, der Rat auz In, auf die egenanten mawer ze beschawern, und In baidenthalben, ein recht ze sprechen, wo hin die egenant mawer gehoren solt. Nu haben wir uns ervaren, nach gueter chuntschaft, und gewizzen, der gnachtgepawern, der erbensten, und der pesten, und nach alten marchen, und haben nach unsern trewn, zwischen in paidenthalben, ein recht, umb die egenanten mawer gesprochen. Also mit ausgenomner rede, daz die obgenant mawer, gar und gentzleich gehoret zu des obgenanten Weycharts des pheilsnitzer hous, und daz auch der egenant Gerung der nadler, noch alle die, die daz egenant sein hous nach Im inne habent und besitzent, dhain recht in die vorgeschriben mawer haben sullen, weder mit Tramen dar in noch mit durchzugen, noch mit chainer lay sachen, dar in ze pawen noch ze machen, weder chlain noch grozz. Und dar nach chomen wier wider fur den Rat, und sagten da unser chuntschaft, mit unsern trewn, als wir ze recht solten. Und dar umb so geben wir, von gehaizz und geschêfte des Rats der Stat ze Wyenne, dem egenanten Weycharten dem pheilsnitzer, und seinn nachkomen disen brief ze einer waren gezeugnusse diser sache versigiltn mit unsern Insigiln Der brief ist geben ze Wyenne nach christes gebuerd dreutzehen hundert iar, dar nach in dem ains und sechtzgistem iar, des phintztages nach sande Giligen tage.

Source Fulltext: Peter Peusquens