Ich Eberhart der praitter purger ze Tuelln und ich Agnes sein hausvrowe und unser erben wir vergehen offenlich an dem brif umb di vier phunt wienner phenning gelts purchrechts . di wier gechauft haben von dem erbern mann hern Jacoben dem Chetner ze den zeiten des Rats der stat ze wienn und von vrown Annen seiner hausvrowen und von iren erben und die hernach geschriben stent des ersten zway phunt gelts purchrechts gelegen auf Niclas weingarten des mutleins aidem in dem smalen graben ze Newnburch des ein halbs jeuch ist und ein phunt gelts auf einem virtail weingarten in der vinstern gazzen daz Leupolts des gweltleins do ist an dem Griezz ze Newnburch und ain phunt gelts auf . einem wein-garten . des ein halbs jeuch ist gelegen ze Chritzendorf an der Swableiten der Fridreichs des Schelm von Nidern Chritzendorf do ist als auch die brif sagent di si der uber gehabt haben . deu si uns ingeantwurt und geben habent und di wier verlorn haben . Daz wier uns umb di selben brief di wier verlorn haben, dar umb gegen in mit dem gegenwuerti-gen brief verlupt und verpunden haben. Also daz der egenant her Jacob der Chetner und vrowe Ann sein hausvrowe und ir baider erben und alles ir guet do mit si sich ze scherm in unserm haus brief beschriben habent des selben scherms sullen fuerbas gar und gantz ledig sein mit der be-schaidenhait, daz in der chauf brif den si uns geben haben zu cheinem schaden nicht bechoemen sol weder vil noch wenich. Und des ze urchund so geben wir in den brif versigelt mit unserm Insigel und mit des erbern manns Insigel Niclas des Luchner purger ze wienn der der sach gezeuge ist mit seinem Insigel. Der brief ist geben ze wienn nach Christi gepurd drewtzehen hundert iar dar nach in dem drew und Sechtzigistem jar des naesten phintztages nach Sand Elzpeten Tag.

Source Fulltext: Peter Peusquens