Dem Wirdign geistlichen herrn Hannsen Kessler Capplan des Hawnollt Schuechler seling stift. Einbewdt Ich Hanns Praytschopff mein dinst in gutn willn zubevor, Als mir von verkauffung wegen weilennd Thoman Praytschopff meines vattern seling hawss zu Nidertobling in Ewer wirde gruntbuech ain satz umb syben phundt phening gethon unnd verschriben, daran ich verschiner zeit vier phundt phening Empfangen das mir demnach der Erber Hanns Sygl innhaber bestimbts meines vattern hawss ausgericht unnd betzallt hat drew phundt phening, unnd ich bin also damit der syben phundt phening satz ganntz Enntricht unnd betzallt, Demnach An Ewr wirde mein vleissig bitten wolle den satz in dem gruntbuech umb dieselbn syben phundt phening ab unnd austhun lassen wan ich Ewrer wirde all mein gerechtikait daran hiemit ganntz ledig unnd frey aussennde, unnd wan das also beschen ist so gelobe unnd versprich ich Ewr wirde wider solh abthueung des satz und verfertigung des hawss nichts zureden hanndln noch thun weder mit nach an Recht in kain weis sondern ich will sollichs umb Ewr wirde zuverdien geseissen sein Mit urkundt des Brieffs verfertigt umb meiner vleissigen bete willen, Mit der Erbern Ulrichn Schrott unnd Hannsen Pirkhamer baid gesessn daselbs zu Nidertobling aufgedrukhten petschadtn doch in unnd irn Erben anschaden. Geben zu Wienn an Montag nach sannd Ursulla tag Anno domini XVc unnd im sechsundzwainzigistn jarn.

Source Fulltext: Peter Peusquens