Wir Albrecht von gotes gnaden, Hertzog ze Oesterreich, ze Steyr, ze Kernden, und ze Krain, Graf ze Tyrol etc. Embieten unsern getrewen lieben, allen unsern Lantherren, Houptleuten, Rittern, und Chnechten, Purgrafen, Richtern, Mauttern, Zollner, Vitztuomen, Phlegern, und allen andern unsern ampleuten und undertanen, den diser brief getzaigt wirdt, unser gnad, und alles guot. Wir tuon ew ze wizzen, daz unser getrewen..die Chaufleut von Wienn, den wir die Strazze von Venedi empholhen haben, ze besetzen, unsern getrewen, Jansen den Moyse, der ew, disen brief zaigt, von irn wegen, in, und auz, die Strazze ze verhuetten, und ze besetzen, geschikchet habent, ueber den Charst, auf Wazzer, und auf Lande, und all verpotten Strazze, ze verhueten, vor die rechten Strazze gen Wien. Darumb emphelhen wir ew ernstlich und wellen, auf welicher hab, er, ew, zaigt, oder ir selb chomen muegt, daz ir die aufhalet, und halb nemet, und uns den andern halben tail, antwurttet, in unser Chamer, als wir ew, das, vormals, mit unsern offenn briefen empholhen haben, und ouch denselben Jansen, von unsern wegen, vestichleich darauf schirmet, daz im von yemann chain beswerung, noch hindernuzz beschech. Wan wer im daran chain (sic!) irrung têt, das wêr gêntzlich wider uns, und wolten den darumb swerlich pezzern, an leib und an guot. Geben ze Wyenn an phintztag vor sand Thomans tag, des heiligen zwelfpoten, anno LX° septimo d(ominus) d(ux) d(ominus) c(ancellarius) Wêhinger

Source Fulltext: Peter Peusquens