Wir Albrecht von Gots gnaden, Hertzog, ze Oesterreich, ze Steyr, ze Kernden, und ze Chrayn. Graf ze Tyrol etc. Embieten unsern lieben getrewn .. allen Lantherren, Rittern, und Knechten, in Oesterreich, den, diser brief getzaigt wirt, unser gnad, und alles guot. Es sint fur uns komen, die Purger von Pettow, und habent uns gesagt, wie si von alter herpracht haben, daz si, die strazze nach der Tra, ab, und auf, mit irr koufmanschaft varen sullen, und uber den Charst, und ouch die strazze von Pettow, gen Ungern. Da engegen, haben wir verhoert unser koufleut ze Wyenn. Die sprechent, und haben uns beweist, vor unsern herren, daz die purger von Pettow, dieselben strazze, nicht recht habent ze varenn. Wan solten si, die varen, das were uns, an unsern Ampten, und unsern Landen, und Leuten, grozzer schade. Davon emphelhen wir ew, ernstlich, und wellen, daz ir uns wizzen lazzet, wes ir, darinn gedenchent, und was ewer chuntschaft dar an sey, und uns, das, ze wizzen tuot, und schreybt, an ewerm offenn briefe, bey ewern trewn, als ir, uns, des gepunden seit. Geben ze Wyenn, an Mêntag nach sant Merteins tag. Anno LXo septimo.

Source Fulltext: Peter Peusquens