Wir Nichlas der Wuerffel ze den zeiten purgermaister Und der Rate gemain der Stat ze Wienne, vergehen offenleich mit dem brief . Das wir von des gepotes wegen, so der hochgeborn furst Herzog Rudolff selig von Oesterreich in der Stat und vorsteten ze Wienne, umb Gruntrechts und Purchrechts ablosunge gepoten und aufgesatzt hat, und wannd ein Gruntherre oder Purchherre seins Gruntrechts oder Purchrechts auf hawsern oder auf pawmgerten in ainem Moneid nicht abzelosen geben wolt, und das man, denselben Gruntherren oder Purchherren, das gelt umb das vorgenant Gruntrecht oder Purchrecht angepoten hiet und des Si nicht nemen wolten, Das denne die Stat ze Wienne, mit irem GruntInsigil, an derselben Gruntherren oder Purchherren stat be-steten sol, und sullen denne diselben Gruntherren und Purchherren ier gult gentzleichen verlorn haben, als der brief sagt den der vorgenannt Herzog Ruedolff mit seinem grozzem fursteleichem anhangundem Insigil besigilt der egenanten Stat ze Wienne hinder Im lazzen hat, Und wenne der Erber herre her Antonii ze den zeiten chappellan des alters sand Katrein ouf der poerchirchen datz unser vrown auf der Steten ze Wienne, der drew phunt wienner phenning gelts purchrechts die er gehabt hat ouf Chunrates haws des Veials, gelegen ynnerhalb Stubentor gegen dem Mawt-haws ueber zenast Wolferams haws des Puechschreiber, ze wienne, nicht abzelosen geben wolt, und man In doch die phenning umb daz selb purchrecht in der zeit und vorbenant ist angepoten hat, vier und zwaintzig phunt wienner phenning, der er nicht nemen wolt. Darumb so sagen wir mit gemainem Rate, den vorgenanten Chun(r)aten den Veyal und sein erben und nachkomen die dasselb haws nach Im innehabent, und besitzent der egenante drew phunt gelts purchrechts, furbaz ledig und vrey nach des obgenanten Herzog Ruedolffs aufsatz, Mit urchunde ditzs briefs, besigilt mit dem vorgenannten GruntInsigil der Stat ze Wienne Der brief ist geben ze Wienn nach Christs geburt drewzehen hundert iare darnach in dem neun und sechtzkistem jare des sambstags nach sand Jacobs tage des heiligen zwelifpoten.

Source Fulltext: Peter Peusquens