Wir Albrecht und Leupolt, brueder von gutes gnaden, Hertzogen ze Oesterreich, ze Steyr, ze Kernden und ze Krain, Grafen ze Tyrol etc. Bechennen, und tuon chunt, daz vor uns gewesen sind, die erbereren, unser getrewn lieben .. der Purgermaister .. der Richter, und der Rat unsrer Stat ze Wienn, und habent uns beweiset, daz si, und dieselb unser Stat ze Wienn, von weilent, unserm lieben herren, und vatter, Hertzog Albrechten, dem got genad, einen brief gehabt haben, Swa halt ier weingêrten, gelegen sind, daz man von denselben weingêrten nindert anderswo zehenden sol, dann da man, den wein presset. Davon mainen, und wellen wir gar ernstlich, bey unsern hulden, daz es noch dabey beleibe, und ouch gênzlich volfuert werde, und daz denselben unsern purgern nieman dhainen Inval, noch irrung daran tuo, wer der sei, und ouch yeman ander gestatte ze tuon, in dhainen weg. Wer aber ez, daruber tête, der têt gêntzlich wider uns, und wolten in, gar swêrlich, darumb pessern. Geben ze Wienn, an sand Lamprechts tag. Anno domini Millesimo Trecentesimo Septuagesimo. domini duces ambo et ceteri consules.

Source Fulltext: Peter Peusquens; siehe auch: • Tomaschek, Rechte und Freiheiten I, 178, no 83 aus dem Eisenbuche, mangelhaft berichtigt nach dem Originale.