Wir Albrecht und Leupolt gebrueder, von gottes genaden, Hertzogen ze Oesterreich, ze Steyr, ze Kernden, und ze Krain, Grafen ze Tyrol etc. Bechennen, und tuon chunt, offenlich mit disem briefe, als sich, unser getrewen lieben .. der purgermaister .. der Rat, und die purger ze Wienn fuer uns, mit irem offenn briefe, verpunden habent, daz si dem edeln, Graf Meinhartten von Goertz, unsem lieben Oeheim, seiner Graefinne, oder iren chinden, alle jar, von der Schatzstewer ze Wienn, geben und raichen wellent Sechs Hundert phunt, wienner phenning, alle die weil wir, si, der Sechs Tausent phunt, ouch wienner phenning, darumb wir, mit in, sein ûber ain komen, nicht gericht noch gewert haben. Also sullen und wellen wir, den egenanten unsern purgern, alle jar, die vorgenanten Sechs Hundert phunt, an irer Schatzstewer, abziehen, als lang, si, die gebent, und als lang si, damit gen den egenanten, Grafen, und Graefinne, oder iren kinden, phlichtig, und gepunden sind, an allez gevêr. Mit urkund ditz briefs. Geben ze sand Veytt, an Sunntag vor sand Merten tag. Nach Kristes gepurd drewtzehen hunder iar, darnach in dem sibentzigisten jare. Wehinger, magister curie.

Source Fulltext: Peter Peusquens