Ich Peter Mannseber ze den zeiten amptman und pergmaister des Chlosters ze Newnburch vergich und tuen chunt offenleich mit dem prief, umb den weingarten gelegen ze Nusdorf in dem Mitterperg, des drew viertail und ein sechstail eines jeuchs, ze naest Mertten weingarten des Reindleins. Da von man alle jar dient dem Chloster ze Newnburch zwen Emmer weins, und anderhalb staeff weins ze perchrecht, und aindlef Ort ze voitrecht und nicht mer, Das ich obgenanter Peter, des vorgenanten weingarten den Stephan her Jacobs schreiber des Chetner demselben seinem herren geschafft hat, denselben hern Jacoben den Chetner, und sein erben, hab gewaltig gemacht, und an die gewer gesatzt, fuer viertzig phunt wienner phenning, di demselben hern Jacoben dem Chetner ledichleich von demselben seinem schreiber dar auf verschafft sind, und fuer dreizzig phunt wienner phenning, di derselb Stephan sein schreiber durch seiner sel hail willen, und seinen frewnden dar auf verschafft hat, und di derselb her Jacob der Chetner, all verricht und geben hat, also daz derselb her Jacob der Chetner, und sein Erben, fuer diselben Sybentzig phunt phenning, den vorgenanten weingarten suellen fuerbas ledichleich und freileichen haben und allen iren frumen damit ze schaffen verchauffen versetzen, machen schaffen und geben swem si wellen, als in das aller pest wol chom und fueg an allen chrieg und irresal. Und des ze uerchund so gib ich dem egenanten hern Jacoben dem Chetner, und seinen erben den prief versigelt mit meinem Insigel, und mit des erbern herren Insigel, hern Albrechtes di zeit Chappellan der aindlef Tausent magt alter datz uenser vrowen auf der Stetten ze Wienn, und mit des erbern manns Insigel hern Jannsens des Phuntimaschen, di zeit des Rats der Stat ze Wyenn di der sach getzeug sind mit iren Insigeln. Der prief ist geben ze Wyenn nach Christi gepuerd, Drewtzehen hundert jar darnach in dem Sybentzigistem jar des nasten Mitichens vor sand Cholmans tag.

Source Fulltext: Peter Peusquens