Ich Jeorig und Hans Gepruder von Fuchawe und alle unser erben Tun kunt offenlich mit disem brief, umb den Hof gelegen ze Swechent, zwischen den Wazzern, und den unser lieber Bruder Jacob von Fuchawe, recht und redlichen verchauft hat, dem erbern man Herman Mulndorf chamerschreiber, frawen Annen seiner hausfrowen, und irn erben, alz der kauffbrief sagt den si darueber haben, verhaizzen, und geloben wir fuer uns, und fuer alle unser erben, mit unsern trewen an aydes stat und an alles geverde, daz wir hintz dem vorgenanten Herman, frawen Annen seiner hausfrowen und irn erben, von dez egenanten hofs und aller seiner zugehorung, fuerbazz nymmer mer, chain ansprach, wartung vordrung noch recht gehaben sullen, weder umb vil, noch umb wenig. Ouch sulln wir noch unser erben, von des egenanten hofes wegen, kain raytung vordern, hintz unsern Oeheimen, hern Hansen dem Amaizzer dem Alten, und Hansen dem Jungen Amaizzer, seinem Suen, noch hintz iren erben. Das haben wir ouch mit unsern trewen, an allez geverde, ouch verhaizzen ich Jorg, und Hans gepruder von Fuchawe, fur uns und unser erben, daz wir die brief, die wir, noch haben, die den egenanten hof ruerent, legen sullen ze einem erbern mann die dem egenanten Herman Mulndorf, vrawen Annen seiner hausfrowen und iren erben, chain schad sein sullen, und furbazz tod, und ab sein, und kain kraft haben. Mit urkund ditz briefs, versigelt mit unsern Insigeln, und mit dez erbern herren Insigel hern Hansen ze den zeiten Pharrer ze Swechent ze sand Jacob. Der brief ist geben ze Wienn, nach Krists gepurd drewzehen hundert jar darnach in dem drew, und Sybentzigistem jare, an sand Philipps und sand Jacobs tag.

Source Fulltext: Peter Peusquens