Ich Michel der Vierdung ze den zeiten Statrichter ze Wienn vergich offenlich an dem brief, das fuer mich cham in die Purgerschrann ze Wienn, do ich sas an offem gericht, Chuenrad Perngêr hern Niclas diener des wuerffels, und chlagt mit vorsprechen an desselben seines herren stat der im di Recht mit vollem Gewalt het auf geben ze flust und ze gebin auf Mêrchleins haws des Juden, gelegen in dem Schuelhof uender den Juden ze Wienn zenaest Peltleins haws der Judinn umb fuemf phunt wienner phenning gelts versezzens puerchrechtes und umb alle die zwispil die mit recht dar auf ertailt und gegangen sind als verre uentz das ich im mit recht Poten dar auf gab Micheln den Schreiber, und Jannsen von Veltzperg, di zwen vorsprechen di habent auch paid, dar umb gesagt mit iren trewn var offem Gericht als si ze rech sullen, daz si daz egenant haws mit den umbsetzen daselbs haben beschaut und geschatzt das es so tewer nicht enist als das ver-sezzen puerchrecht und die zwispil die mit recht dar auf ertailt und ergangen sind, und darnach ward gevragt was recht wêr, do geviel mit vrag und mit uertail Mier solt der obgenant her Niclas der wuerffel, mein recht geben. Das hat er getan. und solt ich in des egenanten hawses gewaltig machen. und an di Gewer setzen das han ich auch getan. Also, das er, dasselb haws sol fuerbas ledichleich und freylich haben, und allen seinen frumen damit ze schaffen verchauffen versetzen und geben swem er welle, an allen chrieg und ierrsal und solt ich im des mein uerchund geben. Und des ze uerchund so gib ich hern Niclasen dem wuerffel, den prief versigelt mit meinem Insigel. Der prief ist Geben ze Wyenn nach Christi gepuerd drewtzehen hundert jar, darnach in dem drew und Sibentzigistem jar, des naesten Mitichens vor unser Vrowen Tag ze der Gepuerd.

Source Fulltext: Peter Peusquens