Wier Albrecht von gots gnaden, Hertzog ze Oesterreich, ze Steyr, ze Kernden, und ze Krayn, Graf ze Tyrol etc. Bechennen und tuon kunt offenlich mit disem briefe, daz fuer uns komen, der erber geistlich unser lieber andechtiger Abt Donat, des Klosters, ze den Schotten ze Wienn, sand Benedicten ordens, an seinselbs, seines Convents, und des klosters stat, an aim tail, der Purgermaister..der Richter, und die Purger ze Wienn, an dem andern tail, von ettlicher stoezz, und misshell wegen, die zwischen in waren, sunderlich von der Gerichte wegen, und zaigten, uns darumb ze bederseitte, die hantfesten und briefe, die in darumb von unsern vorvordern gegeben waren, derselben stoezze, und missehelung, si ze bederseitt, hinder uns, und unser herren, die dazemal bey uns waren, gegangen sind, und gelobten auch in unser hand stêt ze haben und ze volfueren, swas wir und unser herren darumb erfunden, und sprechen. Da sprechen wir, des ersten, daz unser Richter der Stat ze Wienn, wer der ye ze den zeiten ist, das pluot und den tod ze richten habe ueber des Abts holden, und sein diener, die, im, von seinen gronden dienent in aller der mazze, als er, ander pluot, und toed richtet, in dem Statgericht, daselbs ze Wienn. Es sol auch derselb unser Richter, dem Abt, ab seinen guetern nichts nemen, umb die wandel, die, ein Schuldiger gen in verwûrchet hat, und die im mit dem rechten von im gesprochen sind. Derselb unser Richter, mag auch wol, nach dem schuldigen stellen, und wa er, in begreiffet, da mag er in behalten als lang untz daz er mit im abchoeme, und sol auch im der Abt des gûnnen, daz er sich von seiner hab ledig nach dem rechten, und nach gnaden, doch also, daz es dem Abt, und dem Kloster an der freyung unschedlich sey nach ierr brief sag, die, sie, umb dieselben freyung habent. Mit urchund ditz briefs. Der geben ist ze Wienn, an Eritag, vor dem heiligen Palmtag. Nach Christes gepurd dreutzehenhundert Jar, und darnach in dem fûnf und Sibentzgisten iare.

Source Fulltext: Peter Peusquens; siehe auch: Tomaschek, Rechte und Freiheiten I, 187 no 89