Ich Jans der Freitel und ich Lieb sein hausvrowe wir vergehen und tun chunt allen den die disen prief lesent oder horent lesen die nu lebent und hernach chunftich sint. Daz wir mit unser erben guten willen und gunst mit verdachtem muet und mit gesampter hant zu der zeit do wir iz wol getun mochten verchauft und geben haben meiner Swiger vron Elzpeten hern Ernstes witiwen des flaeschhacker dem Got genade dreu phunt wienner phenninge geltes purchrechtes auf Hainreiches haus des Platz insguet daz da leit bei der hymelsporten ze wienne daz weilen des Swantzen gewesen ist. daz selbe purchrecht haben wir verchauft und geben mit allem dem nutz und recht als wir iz in purchrechtes gewer her pracht haben. umb fumfzehen march silbers in zwen und sibentzich grozzer pehaimmischer phenninge fur deu march des wir recht und redleich gewert sein so beschaidenleich daz der vorgenant Hainreich Platzinsguet und sein erben oder swer daz haus nach in besitzet daz selbe purchrecht da von dienen soln der vorgenanten meiner Swiger vron Elzpeten alleu jar da von dienen soln zu drin zeiten in dem iar ain phunt an sant Jorigen Tage ain phunt an sant Michels Tage und ain phunt zu den weihennahten mit allem dem recht als man ander purchrecht in der Stat ze Wienne dient. und dar uber durch pezzer sicherhait so setzen wir uns ich Jans der Freitel und ich Lieb sein hausvrowe unverschaidenleich mit samt unser erben meiner Swiger vron Elzpeten oder swem si die selben Gult schaft oder gibt uber die selben gult zu rechtem gewer und scherm fur alle ansprach als purchrechtes recht ist und der stat recht ze wienne und wand wir selber nicht aigens Insigils haben dar umb so geben wir in disen prief zu ainem offen urchunde und zu ainem waren gezeug diser sach versigilen. mit hern Nichlas und hern Otten der prueder Insigiln von Eslarn die diser sach gezeuge sint mit irn Insigiln. Diser prief ist geben ze wienne nach Christes gepurt dreuzehen hundert jar in dem dreu und zwaintzgisten iar dar nach an dem Pericht Tage.

Source Fulltext: Peter Peusquens