Ich Wolfhart von der Ygla. und ich Pericht sein hausvrowe wir vergehen und Tun chunt allen den die disen prief lesent oder horent lesen. die nu lebent und hernach chunftich sint. Daz wir mit unser erben guten willen und gunst mit verdahtem muet und mit gesampter hant zu der zeit do wir iz wol getun mochten. verchauft haben unsers rechten aigens ein weingarten der da leit ze Grintzingen des ein Jeuch ist haiset der Cherspaem und leit ze naehist des pharrer weingarten von der Heiligenstat. den selben weingarten haben wir verchauft und geben mit allem dem nutz und recht als wir in jn aigens gewer her pracht haben umb siben und saechtzich march silbers ie zwen und sibentzich grozzer pehaemmischer phenninge fur deu march des wir recht und redleich gewert sein dem erbern manne Lambern hern Andres son an dem Chienmarcht ze Wienne und seiner hausvrowen vron Mergarten und allen irn erben furbaz ledichleich und vreileich ze haben und allen irn frumen da mit zeschaffen verchauffen versetzen und geben swem si wellen an allen irresal. und dar uber durch pezzer sicherhait so setzen wir uns ich Wolfhart von der Ygla. und ich Pericht sein hausvrowe unverschaidenleich mit sampt unsern erben dem vorgenanten Lambern und seiner hausvrowen vron Mergarten und allen irn erben uber den vorgesprochen weingarten zu rechtem gewer und scherm fur alle ansprach als aigens recht ist und des Landes recht ze Oesterreich. und geben in dar uber disen prief zu ainem offen urchunde und zu ainem waren gezeuge dieser sach versigilten mit unserm Insigil. und mit hern Leupoldes Insigil des Wenigen. und mit Hainreichs Insigil des Langen. die diser sach gezeuge sint mit irn Insigiln. und sint auch des gezeuge her Hermann der Snaetzel. her Herman der Ene Herman der Luchner Wilhalm in dem Strohof Gebhart unser aidem und ander frumen Leut genuech den diseu sach wol chunt ist. Dieser prief ist geben ze Wienne nach Christes gepurt dreuzehen hundert iar in dem dreu und zwaintzgisten iar dar nach des naehsten Suntages vor dem Palmtage.

Source Fulltext: Peter Peusquens