Wir Albrecht und Leupolt gebruoder von gotis gnaden Hertzogen ze Oesterreich ze Styêr ze Kernden und ze Krain. Grafen ze Tyrol etc. Bekennen und tuon kunt offenlich mit disem brief. Als unser getrewn lieben .. der purgermaister .. der Richter, der Rat und die purger unsrer Stat ze Wienn von unsers geschêfts wegen zusampt uns, mit ierr Statt Insigel, uns besigelt habent, die hantvest, die wir yetzunt unsern Juden gemainlich in Oesterreich, umb iere Recht und freyhait haben gegeben. Daz wir denselben unsern purgern gelobt und verhaizzen haben. geloben und verhaizzen In auch wizzentlich mit disem brief, ob Si und dieselb unser Statt, des besigelns zu dhainem schaden chômen, daz wier Si gnediklich da von bringen sullen und wellen an allez gevêr. Mit urkund ditz briefs. Geben ze Wienn an Mentag vor sand Johans tag ze Sunnwenden, Nach kristes gepurd dreutzehenhundert Jar und darnach in dem siben und Sibentzgisten iare. dominus Leup(oldus) et Johannes de Tirnavia.

Source Fulltext: Peter Peusquens; siehe auch: Tomaschek, Rechte und Freiheiten I, 192 no 93.