Ich Gundolt der Tu^ecz, zu^e den zeiten amptmann der erbern herren von Pawngartenperig, vergich und tun kund midisem brief allen lêwten, daz fur mich kom, do ich an dem rechten sazz, der erber man Janns von Segenwerg, pu^erger ze Wienn, und vrogt gein ainem weingarten, des ain viertail ist und leit in dem Wolfgraben zenachst Pilgrime weingarten, des ich perkmaister pin, umb seinen versessen dinsts, des zwai pfunt gelts, als sein brief sait, der mit perkchmaisters insigel bestêtt ist, und vragt zu den drein vierzehen tagen, als recht ist, und ward auch den rechten eriben darumb drew furbot. als recht ist. Do ward gefragt, waz recht wêr. Da ertailten die pergenazzen und ander erberg lewt, dew peÿ dem rechten waren, seyd der erberg man als lang gefragt hiet mit seinem brief geim dem weingarten umb sein versessen dienst und seinen zwispild darauf behabt hiet mit frag und mit urtail und seyt der weingarten nicht tewer wa^er, dann daz purkrecht und die zwispild, ich scholt in des weingarten gewaltig machen und an die gewer seczen, als recht wa^er, furbas allen iren frum damit ze schaffen, und daz hab ich getan und han den egenanten Jannsen von Segenwerg und sein hausfrawen, frawn Affram und ire eriben des vorgenanten weingarten gewaltig gemacht und an die gwer gesaczt, als es dŷ perkgenazzen und ander erber lêwt pey ir ayd und trewn ertailt habent, furbas allen iren frum damit ze schaffen mit verchauffen mit verseczen geben, wem si wellent, an allen krieg. Nach derselben zeit chom dew erber fraw, fraw Elspet. Niclas des Charelpekchen witib, dem got gnad, der der egenant weingart gewesen ist und die gult darauf verchaufft hiet, und tet sich desselben weingarten recht und redleich und ungeno^ett furczicht und gab in auf mit mein Gundolt hant dem offtgenanten Jannsen und sein eriben also, daz si furbas noch ir eriben gen dem weingarten gehaben wolten. Und daz vorgenanter Janns den egenanten weingarten mit frag und mit urtail mit nottading an sein gewalt bracht hab mit rechten recht, als egeschriben stet, des geb ich im disen brief zu urkund versigelt mit meinem insigel, des ist geczeug mit seinem insigel der erber man Gorig der Chu^ersner aydem an dem Newsidel. Der brief ist geben nach Kristi gepu^erd drewczehenhundert jar darnach in dem fu^enfczigistem jar zu^e ostern.

Source Fulltext: FUCHS, Aggsbach (=FRA II/59, 1906) S. 8-9