Wier Ott von gotes genaden des heyligen ro^emeschen reychs ertzkamerer, kûrfurst, und wier Stephan, wier Fridr(eich) und Johans gepru^eder und des egen(anten) herren Otten vettern, auch von gotes genaden alle pfallentzgrafen beÿ Rein und hertzogen in Bayrn etc., bekennen offenl(eich) mit dem brief umb daz gůt und datz dorff, daz Haydenreych von Meyssawe zů seinem chloster geben und machen wil, und dazselbe chloster genant ist Achkspach¹ bey der Tůnawe, Chartůser orden, und gelegen ist in O^esterr(eich) bey Wolfstain und die mit gůt und dorff von uns und unser herrschaft zu^e Bayrn ze lechen ru^eeret, haben wier demselben gotzhaus die besu^endern genad getan důrch besůnder hayl und gelu^ekkhs aller unser vordern seligen da^echtnu^ezz und auch unser aller selhayl willen und haben daz obgenant gůt und dorff im geayget und aygen auch yms die mit kraft ditz briefs und verzeichen auch uns der obgenant lechenschaft der gůt und dorffs ewichleich fu^er uns und fu^er alle unser erben und nåchkomen und fu^er alle die, die daz anru^eeren mag, hertzogen ze Bayrn also, daz wir nach der egen(anten) lechenschaft nymmer dhain ansprach gehaben, noch gewinnen su^ellen in dhain weis, wir noch unser erben und nåchkomen, noch niemen anders von unsern wegen wenig noch vil noch mit dhaynerlay sachen mit u^erku^end dicz briefs, der gegeben ist in ze Pazzawe an mitichen vor sant Gylgentag mit unsern anhangunden insigeln versigelten anno domini millesimo trecentesimo septuagesimo sexto.

Source Fulltext: FUCHS, Aggsbach (=FRA II/59, 1906) S. 35