Urbanus episcopus, servus servorum dei‚ venerabilibus fratribus . . archiepiscopo Pragensi² et episcopo Jauriensi³ ac dilecto filio . . abbati monasterii Scotorum⁴ in Wyenna, Pataviensis diocesis, salutem et apostolicam benedictionem. Militanti ecclesie licet immeriti disponente domino presidentes circa curam ecclesiarum et monasteriorum omni solercia reddimur indefessa solliciti, ut iuxta debitum pastoralis officii eorum occurramus dispendiis et profectibus divina cooperante clemencia salubriter intendamus. Sane dilectorum filiorum . . prioris et fratrum domus porte beate Marie in Axpach, Carthusiensis ordinis, Pataviensis diocesis, conquestione percepimus, quod nonnulli archiepiscopi episcopi aliique ecclesiarum prelati et clerici ac ecclesiastice persone tam religiose quam seculares necnon duces marchiones comites barones nobiles milites et laici communia civitatum universitates opidorum castrorum villarum et aliorum locorum et alie singulares persone civitatum et diocesis ac aliarum parcium diversarum occuparunt et occupari fecerunt castra villas et alia loca terras domos possessiones iura et iurisdicciones necnon fructus census redditus et proventus dicte domus et nonnulla alia bona mobilia et immobilia spiritualia et temporalia ad priorem et fratres ac domum predictos spectancia et ea detinent indebite occupata seu ea detinentibus prestant auxilium consilium vel favorem. Nonnulli eciam civitatum diocesis et parcium predictarum, qui nomen domini in vacuum recipere non formidant, eisdem priori et fratribus super predictis castris villis et locis aliis terris domibus possessionibus iuribus et iurisdiccionibus fructibus censibus redditibus et proventibus eorundem et quibuscumque aliis bonis mobilibus et immobilibus spiritualibus et temporalibus et aliis rebus ad priorem et fratres ac domum predictos spectantibus multiplices iniurias et molestias inferunt et iacturas. Quare predicti prior et fratres nobis humiliter supplicarunt, ut‚ cum eisdem valde reddatur difficile pro singulis querelis ad apostolicam sedem habere recursum, providere ipsis super hoc paterna diligencia curaremus. Nos igitur adversus occupatores detentores presumptores molestatores et iniuriatores huiusmodi illo volentes eisdem priori et fratribus remedio subvenire, per quod ipsorum compescatur temeritas et aliis aditus committendi similia precludatur, discrecioni vestre per apostolica scripta mandamus, quatenus vos vel duo aut unus vestrum per vos vel alium seu alios, eciamsi sint extra locum, in quibus deputati estis conservatores et iudices, priori et fratribus efficacis defensionis presidio assistentes non permittatis eosdem super hiis et quibuslibet aliis bonis et iuribus ad priorem et fratres ac domum predictam spectantibus ab eisdem vel quibusvis aliis indebite molestari vel eis gravamina seu dampna vel iniurias irrogari facturi dictis priori et fratribus, cum ab eis vel procuratoribus suis aut eorum aliquo fueritis requisiti, de predictis et aliis personis quibuslibet super restitucione huiusmodi castrorum villarum terrarum et aliorum locorum iurisdictionum iurium et bonorum mobilium et immobilium reddituum quoque ac proventuum et aliorum quorumcumque bonorum necnon de quibuslibet molestiis iniuriis atque dampnis presentibus et futuris, in illis videlicet, que iudicialem requirunt indaginem, summarie et de piano sine strepitu et figura iudicii, in aliis vero, prout qualitas eorum exegerit, iusticie complementum non obstantibus tam felicis recordacionis Bonifacii etc. Cetera, sicut in transsumpto predicti Johannis, pape.^a

Source Fulltext: FUCHS, Aggsbach (=FRA II/59, 1906) S. 58-60