Ich prueder Hanns die zeit prior des chlasters unser frawn partn ze Achspach und der gancz convent offn mit dem brif genwu^ertign und chunftigen, daz uns unser lieber genediger und edler herr, her Seycz von Chu^enrring und herr ze Seveld gegebn und geaygent hat uns und unsern nachko^emen die hofstet und ha^ewser gelegn in dem pawngartn ze Achstain¹ mit aller i^erer zugeho^erung mitsambt der vischwayd daselbs lêwterleich durch got und durch sein und aller seiner varvardern und nachko^emen sel trast und willn, darumb wir pilleich sein und seiner erbn schuldiger und piter var got sein. In derselbn lieb in got verhaizz und versprech wi^er uns fu^er u^ens und all unser nachko^emen ym und seinen gegenwu^ertign erbn pruederschaft und gemaynschaft in unserm gotshaws angeva^er also beschaydenl(eich), das sy aller der guetta^ot und gueten werich, dy von uns und alln unsern nachko^emen geschehent, mit allm dem heylign gotsdi^enst, der darynn geschiecht und wie der genant ist, taylhêftig su^elln sein in got lebentig und tod, und auch von besunderr lieb willn versprech wi^er in und verhaissn auch, wenn uns gechu^endet wi^ert i^er abgen von disem ellend, das got nach langn ta^egn heilig und selig mach, das wi^er fu^er sew pitn und tu^en welln, als fu^er unser besunder und genadig lieb herrn und gu^eettu^eer nach unser und unsers o^erdens gewanhait und angevêr. Und das das gehaiaz und gelub gancz und unczebrochn beleÿb, daruber geb wir in den brif versigltn mit unsers obgenantn gotzhaws anhangndm insigl. Der geben ist nach Christi geburd drewczehenhundert jar darnach in dem achczgistn jar des nachstn mantags in der mittervasten.

Source Fulltext: FUCHS, Aggsbach (=FRA II/59, 1906) S. 48