Urbanus episcopus, servus servorum dei, dilecto filio . . preposito ecclesie omnium sanctorum in Wienna, Pataviensis diocesis, salutem et apostolicam benediccionem. Hiis, que pro divini cultus et religionis augmento provide facta sunt, ut illibata consistant, libenter adicimus apostolici roboris firmitatem. Exhibita siquidem nobis nuper pro parte dilectorum filiorum . . prioris et fratrum domus porte beate Marie virginis in Axpach, Cartusiensis ordinis, necnon nobilium virorum Johannis¹ et Georgii fratrum, baronum baronie de Meyssaw, Pataviensis diocesis, peticio continebat, quod olim quondam Hayndenricus, ipsorum baronum genitor, de propria salute recogitans^a ac cupiens terrena in celestia et transitoria in eterna felici commercio commutare de bonis sibi a deo collatis predictam domum pro usu et habitacione dictorum prioris et fratrum Cartusiensis ordinis in honorem dicte beate Marie fundavit pariter et dotavit. Cum autem, sicut eadem peticio subiungebat, cuius auctoritate predicta domus fundata extiterit,¹ et an ipsi domui sufficiens dos assignata sit‚ non constet, ac dilecti filii nobiles viri . . duces Bavarie,² ad quos fundus, in quo dicta domus sita est, pertinere dicitur, predicte fundacioni non prebuerint consensum, pro parte prioris et fratrum Cartusiensis ordinis ac baronum predictorum nobis fuit humiliter supplicatum, ut premissis non obstantibus fundacioni et dotacioni predictis robur apostolice firmitatis adicere^a de benignitate apostolica dignaremur. Nos igitur huiusmodi supplicacionibus inclinati discrecioni tue per apostolica scripta mandamus, quatinus, si prefata domus sufficienter^a edificata et dotata sit aut dicti barones ipsam sufficienter edificare et dotare velint, fundacionem et dotacionem predictas non obstantibus premissis auctoritate nostra confirmare procures. Datum Perusii XV. kalendas iulii, pontificatus nostri anno undecimo.||
X||
X Oldradus^c||
X||
G. Gregorii 9, iul.^c||
||
Pro Oldrado Gotfridus^b

Source Fulltext: FUCHS, Aggsbach (=FRA II/59, 1906) S. 92-93