Ich pru^eder Johanns die zeit prior zu Axpach unserr frawn porten und der gancz convent gemain daselbs des ordens von Carthus, wir verriehen und tu^en chunt offenleich mit dem prief alln lew^etn gegenwu^ertign und chu^enftign, die den prief lesent oder ho^ern lesen, das wir habn gebn abzechawfen unsern holdn zu Seiterndorff¹ alln den waicz und arbais, dew gelegen sint auf sechczehn lehn daselbs zu Seiterndorff, die zu derselbn zeit gehabt habnt und dorauff gesessen sint dieselbn unser holdn, die hernach geschribn sint: von erst Weikhart am Ort auff ainem lehen, Fridl Reichger auf ainem lehn, Stephan Voit auf ainem lehn, Chu^enrad der Weizz, die zeit unser amptman daselbs zu Seiterndorff, auf ainem lehn, Chu^enrad der Tanner auf ainem lehn, Symon der Groz auf ainem lehn, Janns der Schrot auf ainem lehn, Symon im Drumb auf ainem lehn, Peter Nepawer auf ainem lehn, Ja^ekl im Drumb auf ainem lehn, U^elreich der Rawch im Maierhof auf ainem lehn, Fridl Ga^emperl im Maierhof auf ainem lehn, Fridl der Schopp auf ainem lehn, Fridl der Pfeiffer auf ainem lehn, Chu^enczl der Wu^erm auf ainem lehn, Symon der Mo^estl auf ainem lehn und hat ietweder von seinem lehn gedient von alter her sechs meczn waiczz und ainn meczn arbais. Denselbn dienst waicz und arbais und nicht anders habn wir denselbn obgenantn unsern holdn zu Seiterndorff und alln irn nachkomen gebn abzechaufen umb ains und fu^enfczg pfunt Wienner pfenning, der wir gancz und gar gericht und gewert sint also weschaidenleich, das si und all ir erbn und nachko^emen hinfu^er desselbn dienstz waiczz und arbais von denselbn obgenantn sechczehn lehn, do dieselbn obgenantn unser holdn zu Seiterndorff zu derselbn zeit aufgesessen sint und innhabn gehabt, ledig und loz schulln sein und desselbn dienstz hinfu^er nicht mer dienen schu^elln, und habn auch das als den obgenantn gu^eten zu pesserung getan durch unserr trewn willn, wann wir wol verstu^enden, das dew selbn oftgenantn gu^etr u^eberseczt mit demselbn vorgenantm dienst waicz und arbais gewest sint, den sie uns und unserm gotshaws dienen dieselb zeit scholtn und lang zeit vorher gedient hietn zu anderm dienst, den sie auch zu derselbn zeit dientn und noch hinfu^er dienen schu^elln, als sie die zeit mit dienst ausgenomen den oftgenantn waicz und arbais begriffen sint, und sorgtn auch, dew selbn gu^eter wurdn uns und unserm gotshaws von desselbn u^eberign dienstz wegn o^ed lign, und habn auch die- selben ains und fu^enfczg pfunt pfenning hinwider unserm gotshaws zu nucz und zu frum an ander gu^eter gelegt und habn herwider chawft ainn hof gelegn zu Strobdorff von Hannsen dem Radler umb sechsundsechcz phunt Wienner pfenning und habn dasselb gelt an chain ander nu^ecz gelegt, dann als vorgeschribn stet. Und das alles das sta^et und unczebrochn hinfůr ewigleich beleib, das obn an dem prief geschribn ist, doru^eber gebn wir den oftgenantn unsern holdn zu Seiterndorff und alln irn erbn und nachkomen den prief besiglt mit unsers vorgenantn gotshaws anhangendm insigl und darczu so habn wir auch gepetn den erbern priester, hern Gerungn, die zeit capplan zu Hofkirchn,² der auch dieselb zeit pey uns in unserm dorff zu Axpach³ mit haws gesessen ist, und auch den erbern chnecht Chu^enradn den Schefwoltn, die zeit purkgraf u^enserr liben herren von Meyssaw zu Wolfstain, das der sach geczewg sint auch mit irn anhangendn insigln in an schadn. Der prieff ist gebn wordn nach Christz gepu^erd dreiczehn hundert iar darnach in dem achczigistm iar an sand Thamantag des zwelfpotn.

Source Fulltext: FUCHS, Aggsbach (=FRA II/59, 1906) S. 94-96