In dem namen der heiligen drivaltikait; amen. Seind alle ding, die in der zeit gehanndelt werden, sich vervallent mit dem vall der zeit, so ist notdurft, daz dieselben ding mit der schrift gevestingt und geewingt werden. Davon ich Hanns von Meissaw, obrister schenk in Osterreich, betracht hab die kranchait dez gegenwurtigen lebens und daz auch allew kristenmenschen stêttleich arbaitten sullen nach lon und merung gotleichs dinstes und bekenn offenleich mit dem brief fur mich und all mein erben und nachkomen gegenwurtigen und kunftigen umb die sêligen und andechtigen stifft des goczhaws unser frawen porten ze Achspach dez ordens von Carthus, daz mein lieber vatter, hern^a Haydenreich von Meissaw sêliger¹ und mein lieber bru^eder, her Leutolt² und her Jo^erig³ selig und ich got und der hochgelobten seiner mu^eter Marie und allen heiligen ze lob und ze eren und unsern und allen unsern vorvordern und allen gelaubigen seelen ze hilf und ze trost von newn dingen gepawet gewidemt und gestifft haben und die egenanten mein lieber vatter und bruder sêlig die obgenant stifft zu ganczen ennd nicht bracht haben, darumb ich mit gutem willen wolbedachtem mu^et mit rat meiner nêchsten frewnt in der zeit, do ich es mit recht wol getu^en mocht, die obgenante stifft volbring und volfur wissenndleich mit dem brief und mit den hernach geschriben gutern, die ich darczu ewikleich gegeben hab und die all mein freys und rechcz aygen sind: vonn erst ze Rabenntann⁴ vier pfunt und achthalb und sibenczig pfenning gelts auf behawstem gut und zwelif hu^enrr oder für yecz hu^en vier pfenning und funfunddreissig meczen habern dinsts ewig gelcz; item ze Griespach⁵ fu^enfczehen schilling achtthalben und zwainczig pfenning gelcz und vier hu^ener; item ze Mulbach⁶ ain halb pfundt zehen pfenning gelcz und zway hunrr und vier meczen habern; item zu dem Gundolts⁷ siben schilling zwen pfenning gelts, ain hun und zwelif meczen habern; item dacz dem Rudweins⁸ vierundczwainczig pfening gelts und vier meczen habern; item ze Selbicz⁹ achczig pfenning gelcz, ain hu^en und vier meczen habern; item ze Kirchpach¹⁰ funfundvierczig pfenning gelts; item ze Arnoltsperg¹¹ sechczig pfenning gelts, ain hun und drey meczen habern; item ze Lempach¹² siben schilling sechczehen pfenning gelcz und zway hu^enrr und zwelif meczen habern; item auf der Hellmu^el¹³ dreyssig pfenning gelcz; item ze Haselpach¹⁴ ain halb pfunt sechczehen pfenning gelts und zway hu^enrr; item ze Wisentsveld¹⁵ siben schilling sechczehen pfenning gelts und zwen meczen magen Weytraer mazz und gehorn die obgen(anten) gu^eter alle in daz ampt gen Rabentann;⁴ item dacz dem Gundolcz⁷ drey schilling zwenundzwainczig pfenning gelcz und sibentalben meczen magen; item ze Mulbach⁶ ain pfunt gelcz mynner zwen pfenning; item ze Griespach⁵ funf schilling gelcz mynner zwen pfenning und dreyundczwainczig meczen magen; item ze Haselpach¹⁴ ain halb pfunt gelcz, zehen meczen magen; item ze Wisentsveld¹⁵ siben schilling sibenczehen pfenning gelts und ainundzwainzig meczen drew viertail magen; item ze Newndorf¹⁶ pey Gutenberg sechsundfunfczig pfenning gelts und ainen halben meczen magen; item ze Lempach vier pfunt achtundachczig pfenning gelcz nêwn meczen und drew virtail magen; item ze Arnoltsperg vierundsechczig pfenning gelcz und drew virtail magen; item ze Kirichpach ain halb pfunt zehen pfenning gelcz und newen meczen magen; item ze Selbicz ain pfunt funf pfenning gelcz und zehen meczen ain viertail magen; item ze Newndorff¹⁶ in Kirichpekcher pfarr newenundzwainczig pfenning gelcz; item ze Frawiczenslag¹⁷ vierundachczig pfenning gelts; item ze Hawspach¹⁸ aindlef pfenning gelts; item zu dem Dyetmars¹⁹ zehen schilling sechczehen pfenning geltes; item ze Marbach²⁰ sechs meczen magen dinsts und zehent und trêt der zehent daselbs zu gleichem jar ainen mutt chorn, ainen mutt habern; item dacz dem Rudweins drey schilling gelcz; item ze Richenpach²¹ ainen pfenning gelcz, und geho^ern die gu^eter allew in daz ampt ze dem Gundolts; item ze Utissenpach²² newnthalb pfunt drewczehen pfenning gelts und sechs meczen magen und geho^ert in daz ampt gein Mirsenstain;²³ item ze Scho^ennpu^ehel²⁴ drew pfunt siben schilling zwen pfenning gelcz und acht meczen magen. Die vorgenanten guter, wie die ze ainczing und nêmleich in urbar benant sind, behawst oder uberlennd pfenning gelt hu^enrr getraid magen korn und habern, wie die benant sind, gestifft oder ungestifft versucht oder unversucht mit aller i^err zugehorung, es sein wa^eld ho^elczer vischwaid oder wiltpan mit allen nuczen eren rechten herrschafft, als wir und unser vorvordern die in aygens gewer herbracht haben, haben wir gegeben geaigent und gewidemt der obgenanten unser stifft unser frawen porten ze Achspach den geistleichen herren, dem prior und dem ganczen convent gemain daselbs got dobey ze dienen und furbas ewikleich und berubleich ze besiczen zu nuczen und ze messen und allen iren frumen damit schaffen, wie ez in und allen iren nachkomen und derselben stifft allerpest kumpt und fu^eget an alle unser und unser erben hindernu^ezz und irrung uns und unsern erben nichtes darum ausgenomen noch behalten und in allem dem rechten, als in mein vater und mein brudêr sêlig und ich zu derselben stifft vormallen auch gu^eter gegeben haben, als auch ir stifftbrief lautt und beweisset, den si von uns darumb habent, und sind die offgenanten gu^eter alle an pfenning gelt hunrr getraid magen korn und habern geraitt gescha^eczt und angeslogen und bringent mit su^emm newnundsechczig pfunt siben schilling sechsthalben pfenning gelcz. Desselben gelcz geben wir in fu^enfczig pfunt gelts, die in an der ersten ausrichtigung derselben stifft unczher abgegangen sind und die wir in anderswo jêrleich erstattet haben. Auch geben wir in vierczehen pfunt gelts fur vierczehen mutt habern, der wir in unczher an irer ausrichtigung auch iêrleich ze geben pflichtig sein gewesen. Auch geben wir in dez obgenanten gelcz fu^er drithalb pfunt gelts fur zehen meczen magen, dez wir in unczher allew jar jarleich cze geben warn gebunden. Dannoch besten von der offtgenanten su^emm drew pfunt drey schilling sechsthalben pfenning gelts, die wir in auch geben und geben und aigen an der ausrichtigung, die wir auch ze geben und auszerichten haben versprochen. Die offgen(anten) gu^eter allew haben wir in gegeben geaigent und gewidemt in dem rechten, als vorbenant ist, und doch ausgenomenleich mit der beschaidenhait, wann wir oder unser erben in und irem kloster alsvil gu^elt, als oben geschriben stet, auzrichten oder ka^euffen auf gu^etem aygen gutem, die in und irem kloster gelegen sein und daran si auch wol und pilleich genu^eget, es sey ze ainczing oder mit einander, so sullen dann von in die egen(anten) gu^eter alsvil, wie si dann auzgericht eben ze ainczing oder mit einander ledig und lo^es sein an all ir widerred und irrung. Wir sein auch der obgenanten gu^eter aller ir recht scherm und gewer fu^er all ansprach, als aygens scherm recht ist in dem lannde ze Osterreich. Gieng in aber mit rechten daran icht ab, daz sullen wir in alles ausrichten und widerkeren an all ir mue und aribait. Und daz die vorbeschriben sach und hanndlung hinfur also stet gancz und unczebrochen beleib, gib ich obgenanter Hanns von Meyssaw fur mich und all mein erben den offtgenanten herren, dem prior und dem ganczen convent unserr frawen porten ze Achspach und allen iren nachkomen den offen brief besigelten mit meinem anhangundem insigel und mit meiner lieben vettern, herren Chunrats von Meyssaw, obristem marschalkch in Osterreich, und herrn Ulreichs und herren Otten von Meissaw seiner su^en anhangunden insigeln und hab darczu^e gebeten den edln meinen lieben swager, herren Hannsen von Liechtenstain, die zeit meins genêdigen herren herczog Albrechcz etc. hofmaister, und meinen lieben ohêm, herren Hainreichen von Zelking, daz si der sach geczeug sind mit iren anhangunden insigeln. Der brief ist geben nach Kristi gepu^erd drewczehenhundert jar darnach in dem ainsundnewnczigistem jare an sambcztag vor weichnachtag.

Source Fulltext: FUCHS, Aggsbach (=FRA II/59, 1906) S. 112-116