Ich bru^eeder Hans¹ die zeit prior und der gancz convent Carthuser orden u^enser liebn frawn kloster ze Achspach gelegn, gnant unser frawn porten, wir bechennen fu^er uns und all unser nachko^emen offenl(eich) mit dembst brif und tu^en kunt alln la^ewtn gegenwu^ertign und ku^enftign umb die lo^ebleich und hailsamberig stift daz gemêcht geschêft und gab, so der edel unser lieber gnadiger herr, her Hanns von Meyssaw, obrister sch(enk) in Osterr(eich), uns, unsern nachkomen und dem chlo^ester gestift gmacht geschaft und gebn hat. Von erst hat uns geschaft nach seins bri^efs sag, den wi^er darumb von im habn, drew hundert phunt Wiennêr phenning, darnach hat er uns gebn hundert phunt phenning berayter phenning und darczue hat er in demselbn unserm klo^ester gestifft von newn dingen zwo volko^emen zell durch des willn, das wir und unser nachko^emen nach seim to^ed, wan das geschêft volfu^ert wi^ert, der dreÿr hundert phunt phenning dann furbas ewikleich in denselbn zwain zelln su^elln zusambt der andern dreÿczehn, die vor sein lieber vater unser gena^ediger herr, her Haid(enreich) von Meyssaw, unser erster Stifter seliger, gestift hat, zwo persan, die zu priesterleicher wi^erdichait unsers o^erdens sein geschieht, su^ellen habn mit gwant, mit speis, mit irer no^etdu^erft und zu^egeho^erung und gancz wesn ze gleicher weis, als go^etl(eich) und u^ensers o^erdens ist, also das ire hinfu^er fu^emfczehn sein und nicht minner angeva^er, und su^elln auch wir und unser nachko^emen di III^c talente phenning, die er uns und demselbn u^enserm closter seiner stift geschaft hat, und di hundert phunt phenning, de er uns berait gebn hat, uns anlegn, so wir schierist mu^egn, darnach und sy uns gevalln inner ains jars frist nach seim to^ed, an gu^eter, die unserm gotshaus sein wartund, als andrew unsrew gueter, die wi^er zu demselbn u^enserm klo^ester habn, davon wir dann die zwo persan, alls oben benant ist, oder die weil wir di ph(enning) nicht anlegn, fu^er sich su^elln innhabn und ir phlegn mit aller irr zu^egeho^erung, sam an dembst brif ist geschribn, und sulln auch daz volbringn ewikleich angevêrd, so wir best mu^egn, und darumb so verpint wir uns und all unser nachko^emen bey unsern gewissn daz ze tu^en und vollbringn wissenl(eich) mit kraft des briefs versigelt mit unsers gotshaws insigl. Darczue habn wi^er mit trewen gebeten die go^etlichn unsers ordns unser lieb herrn und bru^eeder, di prior und convent ze allerheiligntal dacz Mawrbach und ze u^enser frawn tro^en ze Gemnyk, das sy des geczewgn sein mit irer gotzha^ewser insigl. Gebn etc.^a

Source Fulltext: FUCHS, Aggsbach (=FRA II/59, 1906) S. 143-144