Ich Margret die Voglerinn¹, ich Kathrey Symon des Sneyder hausfraw, swestern, burgerinn² ze Weytra, Hannssen des Haffenpekchen³ seligen tochter⁴ wir vergechen für uns und für all unser erben und tun chund offenleich mit dem brif allen leuten gegenburtigen und chunftigen, daz wir uns mit wolbedachten müt und nach ratt unser nachsten und besten frewnt und ander erber leut, zu der zeit do wir es wol getün mochten, liebleich und frewntleich verricht und geebent haben mit unser lieben stefmuter frawn Annen, weilent des egenanten unsers vater seligen hausfraw, und mit Steffann irem wirt umb alle die ansprach rechten und vordrung so wir gehabt haben auf das haus ze Weytra, gelegen an dem Ekk ze nachst Lippleins haus, daz des egenanten unsers⁵ vater seligen gewesen ist, mit aller⁶ zugehorung, ez sein holden pheninggult ekcher wismad gerten oder welherlai dar zü gehort, wie daz genant oder wo daz gelegen ist, ze veld oder in der stat, ez sei gestift oder ungestift, und auch auf alle de⁷ hab und guter die der selb unser vater seliger hinder im gelassen hat, ligund oder vorund güt, wie daz genant ist, nichts ausgezogen, da für si uns geben haben newnzwanzik phunt phening, der wir ganz und gar verricht und gewert sein zu rechten tagen an all schaden, also daz wir noch all unser erben noch niemant anders von unsern wegen nu furbas hinz der vorgenanten frawn Annen unser stefmuter und Steffann irem wirt und hinz allen iren erben von des vorgenannten haus wegen mit aller zugehorung und ander hab ligunder und vorunder, als vor benant ist, chain ansprach rechten noch vordrung nimmer mer haben noch gewinnen schullen noch wellen mit worten noch mit werichen, mit recht noch an recht in chainen wegen angever, und mugen auch furbas all iren frumen da mit schaffen verseczen vorchaufen⁸⁾ schaffen machen und geben wem si wellent, an all unser und unser erben irrung angever wissenleich mit kraft des brifs. Und wann wir vorgenant Margret und Kathrey nicht aigen insigil gehabt haben, so hab wir mit fleizzigen petten gepeten den edeln herren hern Otten von Meysaw, daz er sein insigil an den brif gehangen hat, und die erbern weisen die burger daselbs ze Weytra, daz si ir stat insigil zusambt des egenanten hern Otten von Meysaw insigil an den brif gehangen haben, dar under wir uns verpinden mit unsern trewn an aides stat und an gever, alles das stet ze haben daz an dem brif geschriben⁹ stet, doch dem egenannten herren Otten von Meysaw und den burgern an schaden. Der brif ist geben nach Christi gepurd dreuzehenhundert jar dar nach in dem acht und neunzigisten jar, an dem suntag als man singet Judica in der vasten.

Source Fulltext: LAMPL, Nachträge (1907) S. 195.