Ich Elzbet Ulreichs des Czannds hausfrawe vergich offenlich mit dem brif gegenwu^ertigen und chunftigen, das dew morgengab, dye mir mein erer wirt sêliger Wolfhart der Zand gemacht hat auf dem gu^et zu See, des ain ganncz lehen ist, da mir aufgemacht ist 10 lb. verlorns gu^et und achczehen phunt nach dem landesrecht ze O^esterr(eich), und dasselb gu^et hab ich mit gu^etem willen der rechten eriben Annen meiner to^echter, die Hans Hyrsvogel hat, gesezzen ze Achstain, mit i^er und ires wi^erts willen dasselb gut verchauft haben nicht tewrr, dann umb czwainczig phunt phenning und das hab ich und mein lieber egenanter wirt Ulr(eich) der Czannd gelegt auf ein ander gu^et, das wir gechauft haben hinder dem erbern und edeln mann Jo^ergen dem Czannd zu Czu^eentring¹ umb dreizzig phunt und drithalb phunt phenning, und auf demselben gu^et u^eber dŷ zehen phunt meiner verlo^erner hab tu ich in auzzaigung umb die andern zehen phunt d. meiner egen(anten) to^echter Annen und irem vo^ergenan(anten) wi^ert Hansen dem Hirsvogel und i^erer bayder eriben, der sy wartund sind noch meinen lebta^egen, auf dem vo^ergen(anten) gu^et zu Zw^eentring ¹ auf behaustem gu^et und pu^erkrecht mit aller seiner zuegeho^erung ze veld, ze do^erf oder wie es genant ist, nichts ausgenomen mit meiner eriben gu^etem willen. Dy^eselben margengab, die mein leibgeding ist, wirt ledig meiner egen(anten) to^echter und iren eriben noch meinen lebtâgen, das mein vorgenanter wirt Ulreich Zand nach unser payder eriben an demselben gu^et chain recht daran haben su^ellen nach wellen hinfu^er nymmermer weder wenig nach vil. Und daz der handl hinfu^er also stêt und unczebrochen peleib und wann ich selb aigens insigels nicht hab, so gib ich vo^ergenantew Elzbeth Ulreichs des Zands hausfraw meiner vo^egenanten to^echter Annen und irem wirt vo^ergen(anten) Hansen dem Hyrsvogel und irer bayder eriben den brif zu ainem waren urkund der sach versigelten mit des erbern manns Hansen von Potschalich² insigl, der die zeit meins gena^edigen gruntherren Jorgeins des Zandz phleger ist zu Zu^eentring, und in meins gena^edigen herren amptman Ott von Zu^eentring vleizz(ichleich) gebeten hat, wann mein herr peÿ dem land nicht was, und mit des erbern manns Lewtolden von Grymsing,³ der der sach geczewg ist awch mit seinem anhangundem insigel, den ich darumb vleizz(ichleich) gebeten hab im und seinen eriben an schaden. Der brif ist geben nach Christs gebu^erd vi^erczehenhundert jar darnach in dem sybenten jar des na^echsten freitags vo^er sand Jo^ergentag.

Source Fulltext: FUCHS, Aggsbach (=FRA II/59, 1906) S. 185-186