Ich brueder Hans die zeit prior unser frawn parten ze Achspach des o^erdens von Carthus und ich her Andre die zeit pharrer ze Gro^ezzemu^egel wi^er bechennen offenl(eich) mit dem brif gegenbu^ertigen und chu^enftigen, das wi^er mit wolbedachtem mu^et und mit wolzeitigem rat betracht und bedacht haben durich merung go^etleichs di^enstes des gotshaus ze Gro^ezzenmugel und durich u^enderstennd vil irresals zwischen dem pharrer ze Grozzenmu^egel und seiner gesellen und wie sich ain zechmaister bey derselben chirichen hinfu^er halten sol mit den gu^eetern, die von alter geho^ert habent zu der chirichen oder zu der chirichen geschafft werdent, o^erden wi^er und setzen hinfu^er, wie es beleiben su^ell mit ganczen trewn angevêr: item zu dem ersten was opffer auf den alter wi^ert von phenning gelt oder silber oder gold, das ist ain des pharrer und dem gesellen darauz der fu^emft phenning auzgeno^emen chelich oder messgewant; item was in den stokch gefellet, do sol auzgevallen den gesellen auch der fu^enft phenning, das ander sol gevallen in zway tail halbs dem pharrer und halbs der chirichen; item was geschêft ist, das man dem pharrer tu^et umb dreyzzig mess, gevellet dem pharrer und den gesellen yedem mann das drittail; item was von gesêllrêt gevellet, sind vi^er phenning der gesellen und drey des pharrer; item so sol vorauz gevallen dem pharrer czwen sambta^eg zu der chiribeich und zu dem chiritag, was do gevellet, das ist halbs sein und halbs der chirchen; item so sol der zechmaister innenemen de gu^eter der chirichen und sol die verschreiben, als er sew innenympt, und auch verschreiben, als er sew auzgeyt, mit gueter gewissen und urchund und auch zwir in dem jar widerraitten dem pharrer und dem richter und den sechsen in dem Aygen an der gmain stat, es sey von dem erbgu^et der kirichen oder von chu^een oder von geschêft wegen, swie so das genant wêr, und besunder was von wachs gevellet, es sey auf den alter oder was man fu^er das heyltumb bangt, das sol er alle mo^eneyd mit gwissen aines pharrer und aines schechser in ain chisten legen und de chirichen damit auzrichten lo^ebleich auch mit gwissen; item was im gevellet mit sampnung, es sey zu aynem liecht oder zu aynem paw, das ompfo^er wêr, oder zu ainer glokken oder von welicherlaÿ sambnung das wêr, das sol er mit des pharrer gewissen und des richter und eines sechsêr in ein pu^echsen legen und darauz nemen noch irer no^etdu^erft auch mit derselben gewissen und auch daz als verschreyben; item was von chelich oder von messgwant der chirichen geopffert oder geschaft wu^ert, das sol er mit vleizz bewaren und hu^eeten, das es icht verderib und die alten messgwant, was unsawber sey, das sol er lassen waschen und pu^eeczen, das es wi^erdichleich genu^eczt wert zu gotsdi^enst, als pilleich ist. Wêr aber, ob das geschêch von gocz o^erdnung, das der chelich ze vil geoppffert wu^ert u^eber no^etdurft oder der messgwant oder welicherlay geschêft das wêr, das man verchauffen solt oder zu phenning pringen solt u^eber dew und man bedarft, das sol man alles tu^en mit des pharrer gewissen, des richter und der sechser und das anlegen der chirichen zu nutzz mit wissen und willen aines prior und herr des gu^etz ze Achspach und ze Gro^essenmu^egel.

Source Fulltext: FUCHS, Aggsbach (=FRA II/59, 1906) S. 245-217