Ich Ga^engel Po^ehem, burger zu Wesendarf, vergich und wechenn offenlich an dem brief fu^er mich und fu^er Magdalen, mein hausfraw^en, und fu^er all unser erben, daz ich mit guter vorbetrachtung und nach zeitigem rat recht und redleich bestanden hab zu vier leiben, daz ist auf mich selben, auf die benante Magdalen mein hawsfraw^en, auf Kathrein mein eltiste to^echter und Elzpeten mein jungiste tochter von den geistlichen lew^eten, pruder Johannsen die zeit prior und von dem ganczen convent des goczhaws unser frawn porten ze Axpach des ordens von Carthus iren weingarten dacz Wesendarff, genant daz Himelreich. und iren paungarten dapey gelegen, der do haisst die Stetten, die payd zwen grunt paungarten und weingarten hab ich bestanden von dem benanten goczhaws auf unser obgeschriben vier leib unser lebtag in bestandsweis innzehaben in solichen rechten und beschaidenhait, als hienach geschriben stet und als auch ir brief laut, den sy uns daruber geben habent: von erst so sullen wir oder auf welhem under uns vieren dieweil der benant standt stet von den benanten zwain grundten dem egenanten goczhaws vorauz alle iar dienen und raichen albeg an sannd Merteintag zway pfunnt pfenning unverczogenlich und darzu alle jar in dem lesen volchomenleich halben bein, waz des gewachsen wirt in dem benanten weingarten und denselben halben tail sullen sy nemen selber auz dem granndt in der press und in ire aigne vas giessen und darumb sullen wir nimmer chains iars an iren willen und an ir wizzen lesen, sunder wir sullen in alle iar dreyr oder vier tag vorhin enpieten, daz sy sich darczu fu^egleich weraitten und iren poten darzu senden mugen. Wir sullen auch nimer chains iars ichtcz von weinpern vor ee, daz sy darzu ko^emen oder senden, ausprechen oder lesen weder vil noch wenig angeva^er, awer ander frucht und obs, waz des ist im pawmgarten und in dem weingarten, mu^egen wir und sullen die nu^eczen und messen zu unsern frumen alspald, so yecleichs zeitig wirt, doch alzo das wir die pawm im weingarten nicht meren sullen, sunder wann der alten aincz oder mer abgent oder verderbent, so sullen wir weinstokch an dieselben stat ziehen. Auch sullen wir die oftgenanten zwen grundt pawmgarten und weingarten, dieweil wirs in bestandweis innhaben, alczeit bewaren mit guten friden, als ez in notdurft und von alter herchomen ist, und von den pawmgarten sullen wir alzeit halten mit pawmen, ez sey mit den alten, die nu darinn sind, oder mit jungen darin ze pringen, alz es von iar ze iar notdurft und nuczleich wirt. Dann den weingarten sullen und wellen wir alczeit halten in gutem voderm paw mit mist mit stechchen mit grubm mit hawn mit aller arbait und notdurftichait, so darzu geho^ert, uber iar winter und sumêr nichcz auzgenomen an allez geva^er und allez verziechen oder sawmung yede arbait zu ir zeit fuderlich auszerichten, alz daz recht und gewo^endleich ist solicher arbait in der Wochaw. Und daz die egenanten geistleich leut besichert und gewizz sein, daz in die obgeschriben pu^ennt und all artikel alzo von uns ga^enczleich gehalten werden, so haben sy gewalt, daz sy mugen zu yeder arbaitzeit und sunderlich zwier im iar ainst umb sannd Jorgentag und ainst umb sannd Gilgentag senden vier mann, die darzu kumen, die es uberall schawen, und ob dieselb vier funden und erkanten, daz sy gesprechen mochten pey iren trewen ungesworn, daz dem pawmgarten oder dem weingarten ichtcz enczogen wêr worden in allen artikeln und punndten, so hie oben geschriben stend, ez wa^er vil oder wenig, so hieten wir alle unsere recht an dem benanten bestannd verlorn und solten und mochten sich dann die egenanten geistleich leut ir paÿder gru^endt, pawmgarten und weingarten, wie sy zu derselben zeit erfunden wu^erden, wider freÿleich underwinden an ma^enicleichs widerred und darzu, wes sy dez encziechens und abgangs der vorgeschriben artikeln schêden hetten genomen, wie die genant oder gescha^eczt wurden von den vier beschawern nach ir gewissen iren slechten worten ungesworn ze gelauben, die sol in ga^enczleich abtragen und widerchern, welh under uns obgenanten viern dieselben zeit den bestannd zu seinen henden hiet. Auch wann der letst leib, darauf der bestannd wirt sten, mit dem todt abget, zu welher zeit im iar daz wirt, so sullen und mugen sich die oftgenanten geystlich leut payder ir gru^ennt pawmgarten und weingarten, mit welherlay arbait oder nucza^en sy dieweil stu^enden, wider underwinden. Doch wa^en sy merkchleich erger worden von encziechens wegen der obgeschriben artikeln ains oder mer‚ waz in daz schêden pra^echt daran, daz vier fru^emer mann mo^echten mit guter gewissen gesprochen, daz sullen in dezselben erben gênczleich widercheren und zu pesser sicherhait, das den benanten geistlichen lew^eten nichtcz an uns ab sull gen, so hab ich obgenanter Ga^engel Po^ehem fu^er mich und mein erben in gesa^eczt mit purkchherren hannden Irrenfrids des Tawben mein haws dacz Wessendorff zena^echst dem Geblin, davon man dem benanten purkchherren ia^erleich di^ent an sand Michelstag vierczechen pfenning zu purkchrecht und nit mer, und secz in auch dazselb mein haws wissentlich mit chraft dicz briefs ze pfannd alzlanng der westandt auf uns obgenant vier leib wirt weren alzo weschaidenleich, ob in icht scheden oder abgangkch in dem westanndt von unsern wegen geschêchen, wie die genant oder gescha^eczt wurden, alz vor begriffen ist, daz sy dann dieselben scha^eden auf dem yecz genanten pfannt haben su^elten und davon wechomen mo^echten an aller unser erben widerred und mo^echten ez auch alz lanng zu^e iren henden halden, uncz daz sy dann dieselben scha^edn auf dem yeczgenanten pfannt haben su^elten und davon wecho^emen mo^echten an all unser erben widerred und mo^echten ez auch alz lanng zu^e iren henden ha^elden, uncz daz sy aller schêden, darin von unscrn wegen, alz vor beru^ert ist, sy komen wern, gênczleich wurden ergeczt. Wenn aber die obgenanten vier leib all abgeunt mit dem to^edt oder benanter bestandt fu^erist widergieng von und wie sich daz ga^eb, und sy auch aller scheden, darynn sy leicht chomen wa^ern, von uns oder unsern erben gênczleich ergêczt wurden, so ist daz haws dann ledig und get unsern na^echsten erben, den ez rechtleich zupu^erd, wider haym an alle irrung. Und wann ich obgenanter Ga^engel Po^ehem nit insigil hab, so hab ich und mein benante hawsfraw^e Magdalen vleissicleich gepeten Irrenfrid den Tawben, des benanten meins hawss purkchherren, daz er den sacz des pfanntcz westa^et, und wann er awer auch nicht aigen insigel hat, so hat er mitsampt uns vleissicleich gepeten den erbern Michel den Recza^er, richter in der Wochaw, daz er die sach westa^et hat mit seinem anhangunden insigil im und seinen erben an schaden. Auch hab ich mitsampt meiner hawsfrawn vleissicleich gepeten den erbern Hannsen Gagerer in der Wochaw,¹ daz er der sach aller czeug sey mit seinem anhangunden insigil im und seinen erben an scha^eden, under den ich mich und mein hausfrawn und die benanten mein zwu^e to^echter verpint peÿ unsern trewen an aydes stat allez daz stêt ze halten, daz hie oben geschriben stet an dem brief, den ich den egenanten geystlichen daruber gib zw westa^etigung zeugnu^ezz und geda^echtnuzz aller obgeschriben handlung. Geben nach Cristi gepu^erd in dem vierczehenhundert iar und dreissigistem jar an sand Mertentag dez heiligen pischolff.

Source Fulltext: FUCHS, Aggsbach (=FRA II/59, 1906) S. 252-256