Wir Albrecht von gots genaden herczog ze Osterreich, ze Steyr, ze Kernden und ze Krayn, margraf ze Mêrherren und grave ze Tyrol etc., bechenen, als unser getrewer Ott von Meyssaw dem gotshaws unser frawn porten zu Axpach Cartuser ordens gemacht und gegeben hat sein haws hie ze Wien mit dem vordern tail an die Hochstrazz und mit dem hindern tail gegen der mynner bruder kloster uber gelegen, das ledig und frey ist, alzo das man nichts davon dienet, als wir vernemen, das wir zu demselben gema^echt unseren gunst und willen gegeben und das besta^et haben und besta^etten auch von fu^erstleicher macht wissentlich mit kraft des briefs, was wir daran zu recht besta^etten sullen oder mu^egen, in solcher mass, ob derselb von Meÿssaw und die erber Agnes sein hausfraw mit dem tod abgingen oder nicht leiberben, das su^en wa^ern, die sy mit einander hieten, hinder in liessen oder ob sy solich leiberben hinder in liessen und das die auch abgingen an leiberben, das su^en waren, das dann dasselb haw^es mit allen seinen eren rechten und zugehorungen, als das von alter herkomen ist, zu dem obgenanten gotshaws geho^eren und hinfur ewicleich dabey beileiben sol ungeva^erleich mit urkund des briefs. Geben zu Wienn an montag nach sand Panngraecztag nach Cristi gepurd vierczehen hundert iar und darnach in dem ainundreissigistem iar.

Source Fulltext: FUCHS, Aggsbach (=FRA II/59, 1906) S. 260-261