Wir Fridreich von gotes gnaden romischer kunig, zu allen czeitn merêr des reichs, hertzog zu O^esterreich, zu Steir, zu Kêrnden und zu Krain, grave zu Tirol etc., bekennen, daz fu^er uns kam der ersam geistlich, unser lieber andêchtiger . . der prior zu Achspach, Kartuser ordens, und gab uns zů erkennen, wie im, seinem convent und gotzhaws daselbs zu Achspach unser getrewr Kaspar Wisendorffer und Dorothea sein hawsfraw vier behauste gu^eter, der zway gestifft und zway ungestifft, und auch daselbs zu Achspach gelegen wêrn und der gestifften yedes acht phenning und der ungestifften yedes sechs phenning jêrleich dienten, und ain holtz gelegen am Du^errnperg,¹ davon man auch jêrlich acht phenning dient, unserr lehenschafft unsers furstentums O^esterreich, gegeben hieten nach innhalt ains briefs von denselben kanlêuten daru^emb ausgegangen und pat uns diemutiglich, daz wir im, denselben convent und gotzhaws die bemelten gu^eter und holtz gnêdiglich zue aygen geru^echten, haben wir angesehen so^elh sein diemu^etig und fleizzig pet und haben voran got dem almechtigen zu lob und auch das wir des gotzdinsts, der in demselben gotzhaws têglich volbracht wirdet, tailhafftig werden, demselben prior, convent und gotzhaws die benanten stukh und gu^eter als lanndesfurst in O^esterreich und vormund unsers lieben vettern, ku^enig Lasslaws geaygnet und aygen auch wissentlich mit dem brief, was wir in zu recht daran aygen su^ellen oder mu^egen also, daz der egenant prior, convent und ir nachko^emen zu Achspach die obgenanten stuck und gu^eter mit iren zugeho^erungen nu fu^erbazzer in aygens weis innhaben nu^etzen und niessen und allen iren frumen damit schaffen su^ellen und mu^egen, als mit anderm irem und irs gotzhaws aygenn gut an unser desselben unsers vettern, kunig Lasslaws und mêniglich von unsern wegen irrung und hindernus ungevêrlich und wir verczeihen uns auch der lehenschafft daran gênntzlich mit urkund des briefs. Geben zu der Newnstat an sambstag nach sannd Veitstag nach Kristi gebu^erde im viertzehenhundert und fu^enftzigisten jar‚ unsers reichs im aindlften jare. Commissio domini regis in consilio.^a

Source Fulltext: FUCHS, Aggsbach (=FRA II/59, 1906) S. 301-302