In nomine Domini Amen. Quia post multos labores et expensas ecclesia Frisingensis et capitulum Ardacense respirare desiderant a lite, et in totum desistere super praepositura Ardacensi, coram venerabili patre Gebehardo Pataviensi episcopo tanquam ordinario, et ejusdem ecclesiae capitulo, decanus cum capitulo Ardacensi protestatus est in jure et confessus, se non habere jus in electione praepositi Ardacensis, vel si quid habet, aut habuit, vel videbatur habere in dicta praepositura, sollempniter renunciavit dictus decanus cum ejusdem ecclesiae capitulo, et illam renuntiationem juramento roboravit sollempni, quod in perpetuum recognosceret Geroldo Frisingensi episcopo, et omnibus ejus successoribus plenum jus et liberam potestatem eligendi praepositum et conferendi praeposituram Ardacensem, praefato domino Gebhardo Pataviensi episcopo judice ordinario praesente, et ejus capitulo ac aliis multis ibidem praesentibus. Insuper decanus dictus cum suo capitulo Ardacensi juramento etiam sollempniter interposito firmavit, quod praenominato episcopo Geroldo Frisingensi, et ejus successoribus nunquam in praepositura contradiceret Ardacensi, aut contradicentibus consentiret. Adjecit etiam suo juramento decanus Ardacensis cum ejus capitulo, quod quicunque de caetero fuerit in ecclesia Ardacensi in praepositum, aut decanum, vel canonicum assumptus, idem praestare teneatur juramentum. Sed ut ista protestatio et renuntiatio sit in perpetuum valitura, rata et illibata et inconvulsa praesens pagina sigilli praedicti domini Gebhardi Pataviensis episcopi, et capituli ejusdem ecclesiae, nec non Ardacensis capituli communitur. Hujus rei testes sunt: dominus Otto major praepositus, magister Chunradus decanus, dominus Kalohus, magister Heinricus Zobello, dominus Chunradus major plebanus, dominus Heinricus de Mistelbach, dominus Eberhardus de Johanstorf, dominus Siboto, magister Albertus de Possenmunster, dominus Wilhelmus cantor, dominus Albertus custos senior, dominus Chunradus custos junior, magister Einwicus, et alii quam plures. Anno incarnationis domini MCCXXIIII. in annuntiatione beatae virginis anni praesentis. Acta sunt haec Pataviae in choro majoris ecclesiae.

Source Fulltext: FRIESS, Ardagger (AÖG 46, 1871) S. 476-477