Noverint singuli hanc paginam conspecturi, quod ego Hermanus, permissione divina Ardacensis ecclesiae praepositus, praenominatas sex urnas vini legavi seu ordinavi capitulo ardacensis ecclesiae perpetuo persolvendas, hac adiecta conditione sive modo, ut praedicti fratres ipsius capituli Ardacensis annis singulis in anniversario felicis memoriae domini Chonradi comitis silvestris, Frisingensis episcopi, qui est primo die intrante Martio, ipsius memoriam peragentes vigilias et missam pro defunctis debeant illa die cum choro sollempniter decantare, quibus exsequiis celebratis, ipso die ob animae suae remedium praedictae VI urnae inter canonicos, qui tunc praesentes exsequiis interfuerint, aequaliter dividantur. Item legavi et ordinavi capitulo Ardacensi aliquas res mobiles in camera mea, pro quibus emeretur per exsecutores ad hoc deputatos aliquod praedium, de cujus censu consolaretur sacerdos, qui in altari S. Corbiniani confessoris in basilica, saltim bis vel ter in qualibet ebdomada celebraret. De praedicta pecunia emptum est feodum in Slaezpach, quod servit V solidos Wiennensium denariorum annuatim. Item adieci et deputavi per donacionem causa mortis praedicto capitulo Ardacensi post mortem meam sex libras Wiennensium denariorum de domo mea apud Waidhouen, quas Ulricus domicellus tunc famulus meus post obitum meum persolvere tenebitur eidem capitulo finaliter ut promisit, propter hoc in eadem domo nobis perpetuo cum suis heredibus successurus, cum hiis itaque sex libris praefatis capitulum emere debebit ex tunc aliquod prediolum, ex quo annuatim in conversione beati Pauli fratres, qui praesentes illo die fuerint in divinis officiis recipiant consolationem aliqualem. Acta sunt haec apud Ardakker anno domini MCCXCVI in die beate Gertrudis.

Source Fulltext: FRIESS, Ardagger (AÖG 46, 1871) S. 487-488