Ich Johans techent ze Ardacher vnd ich Haertneyd pharrer zu Schoenaw wier verjehen offenleich mit diesem prief allen den, di in sehent oder hoerent lesen, di nu lebent vnd her nach chumpftich sint, daz wir mit guten willen vnd mit verdachtem mut zu der czeit, da wir ez wol getun mochten, geben haben vnsern hof, den wir gechauffet haben von Vlreichen von Schiltorf, der rechtz aygen ist, der gelegen ist in Purkstaler pharre vnd haizzet der Listhof an dem Ekke, mit allen vnd rechten, als wir in in vnser gewalt pracht haben, den erber heren, den chorheren ze Ardacher vnd dem capitel da selbs also beschaidenchleich, daz si vns alle iar drey iartege davon lesen sullen ainen iegleichen iar tag mit fumf schillingen vnd zehen phennigen: des ersten mir Johansen dem techent ainen iar tach des nechsten tages nach sand Dorothen tags, dar nach ainen iar tag hern Hartneyden dem pharrer von Schonaw des driten tages nach sand Markus tage, den dritten iar tag hern Sweykern pharrer ze Neukirchen auf der Steyr des nechsten tages nach sand Merten tage mit gesungen vigilij vnd mit gesungen selmessen, als wir prief von in haben. Teten si des nicht, daz si dar an saumich wern vnd nicht begiengen, als vor verschriben ist, swer danne techent ist, der sol sich des holes vnderwinden vnd sol ain ander selgerete da von machen den vorgenanten seien nach seiner gewizzen vnd nach seinen trewen. Vnd daz di rede vnd sache stete vnd vnzeprochen beleibe, geben wir ich Johans techent ze Ardacher den prief versigelten mit meinem anhangendem insigel. Vnd wand ich Hartneid pharrer ze Schonaw aigens insigels nicht enhan, nu han ich den erber ritter hern Walthern purkgrauen ze Sewsnekk gepeten, daz er sein insigel an den prief gelegt hat. Der prief ist geben ze Ardacher do von Christes gepurde ergangen waren drävtzehen hundert iar dar nach in dem drey vnd fumftzigisten iar an sand Dorothen tag der rainen iunchvrawn.

Source Fulltext: FRIESS, Ardagger (AÖG 46, 1871) S. 504-505