In nomine domini amen. Anno a nativitate eiusdem domini MCCCCLVI indictione quarta die vero quartadecima mensis Julii hora vesperarum quarta, pontificatus sanctissimi in Christo patris ac domini nostri, domini Calisti diuina prouidentia papae tertii anno secundo in loco capitulari ecclesiae collegiatae sanctae Margarethae in Ardackcher, Pataviensis dioecesis coram venerabilibus et honorabilibus viris, dominis Erhardo Chollen seniori capituli, Erasmo Habschiching celerario, Heinrico Schirmer custode et aliis canonicis capitulariter congregatis capitulum facientibus et reputantibus meique notarii publici testiumque infra scriptorum praesentia personaliter constitutus egregius vir, dominus magister Thomas Angelpekch, licentiatus iuris decretalis et tunc temporis decanus praenominatae ecclesiae Ardacensis resignat praebendam ac canonicatum suum, quam eo tempore occupat, in manus venerabilis capituli eiusdem ecclesiae, petens omni instancia, qua potuit, conferendi honorabili viro domino Petro Würen de Freinstat et canonicatum et praebendam. Qui quidem domini canonici capitulariter congregati canonicatum et praebendam in manus recipientes et precibus praenominati egregii viri magistri Thomae Angelpekch annuentes et habita matura deliberatione eundem dominum Petrum Würen post iuramentum de statutis et consuetudinibus praefatae ecclesiae collegiatae Ardacensis in possessorem dictorum canonicatus et praebendae iure et forma, quibus debuerunt et potuerunt, receperunt atque in signum verae possessionis eorundem eidem domino Petro locum in capitulo et stallum in choro cum solitis ibidem observatis ceremoniis assignarunt feceruntque sibi de fructibus et redditibus, provectionibus et iuribus omnibus et singulis, quibus interest, iuxta consuetudinem et statuta eiusdem ecclesiae integre prouideri. Super quibus omnibus et singulis idem dominus Petrus Würen de Freinstat requisivit me, publicum notarium, et petiit sibi confici unum vel plura publicum vel publica instrumentum vel instrumenta. Actum ut supra.