Wir Fridreich von gots gnaden Römischer kayser, zu allentzeitn merer des reichs, zu Hungarn, Dalmacien, Croacien etc. kunig, hertzog zu Österreich, zu Steyr, zu Kerndn vnd zu Krain, herr auf der Winndischenmarch vnd zu Portenaw, graue zu Habspurg, zu Tyrol, zu Phiertt vnd zu Kyburg, marggraue zu Burgaw vnd landtgraue in Elsess, bekennen, daz vns der ersam, vnser lieben andechtigen . . n . . der brobst, dechant und capitel zu Ardakher diemutigklich haben bitten lassen, daz wir in die gnad, freyhait vnd priuilegi, damit sy von vnsern vordem fursten von Osterreich loblicher gedechtniss begnadt vnd in bestett seinn, gnedikklich geruchten zu uernewen vnd zu bestetten. Haben angesehen der obbemelten brobst, dechant vnd capitl fleissig bete, vnd den loblichen gotsdienst, so daselbs zu Ardakher teglich volbracht wirdet, des wir dann auch hoffen tailhafftig ze werden, und haben in dadurch vnd von sundern gnaden als herr vnd landsfurst in Osterreich all vnd ieglich ir gnad, freyhait vnd priuilegi vorbemelt auch den wochenmarkht, so in von den bemelten vnsern vordern fursten von Osterreich all sambstag daselbs zu Ardakher ze halten gegeben vnd ettwe lanngzeit nicht gebraucht ist worden, vernewt geben, bestett vnd confirmiert: vernewen geben, bestettn und confirmiern in die auch wissentlich in krafft des briefs, mainen, setzen vnd wellen, daz die in allen iren stukhn, puncten vnd artikln dar inn begriffen genntzlich bey krefften beleiben vnd von niemannden darwider getan, noch gehanndlt werden sol in dhain weis, doch des berurten wochenmarkht halben anndern an iren wochenmerkhten vnuergriffennlich vnd auschaden. Davon gebieten wir den edlen vnsern lieben getrewen .... all vnsern haubtleuten lanndtmarschalhen, grauen, freien, herrn rittern vnd knechten, verwesern, hubmaistern, phlegern, burggrauen, burgermaistern, richtern, reten, mauttern, hannsgrauen, zollnern, burgern, gemainden vnd allen anndern vnsern ambtleuten vnd undertann vnd getrewen ernstlich vnd wellen, daz sy die obbenanten brobst, dechant vnd capitl zu Ardakher vnd ir nachkomen bey den berurten iren gnaden, freyhaiten, priwilegien vnd wochenmarkh berublich vnd gentzlich beleiben lassen vnd sy dawider auch diese vnser bestett nicht dringen, noch beswern, noch des yemannds annderm ze tun gestatten, als lieb in allen vnd ir yedem sey, vnser swere vngnad vnd straff zu uermeiden. Das mainen wir ernstlich. Mit vrkund des briefs besiglten vnter vnserer kayserlichen maiestat anhanngundem jnsigl. Geben zu Wienn am eritag vor sannd Mathias tag des heiligen zwelifboten, nach Cristi gepurde im viertzehen hundert vnd sibentzigisten, vnsers kaisertumbs im achtzehenten, vnser reich des romischen im dreissigisten vnd des hungrischen im aindleften jaren.

Source Fulltext: FRIESS, Ardagger (AÖG 46, 1871) S. 547-548