Nos Bernardus dei et apostolicae sedis gratia episcopus Libanensis (Libariensis ?), reverendissimi in Christo patris ac domini, domini Christophori eadem gratia episcopi Pataviensis in pontificalibus cooperator, universis et singulis praesentes nostras literas inspecturis, lecturis, visuris pariter et legi audituris salutem in domino sempiternam. Noveritis, quod anno domini millesimo quadringentesimo nonagesimo septimo die solis, quo erat quinta mensis Maji, corpus ecclesiae filialis in Stephanshart ad ecclesiam sanctae Margarethae virginis collegiatam in Ardaco de novo funditus erectum et constitutum una cum duobus altaribus, quorum unum a dextris in honorem sanctorum Georgii, Oswaldi et Eberhardi, secundum sanctae Mariae genetricis dei a sinistris, in eodem situatis de commissione et voluntate praefati domini nostri reverendissimi iuxta formam sanctae matris ecclesiae spiritus sancti gratia nobis suffragante diligentia ac devotione, qua potuimus, de novo duximus consecrandum atque consecravimus. Eodem die coemeterium ecclesiae praefatae contiguum pariter reconciliavimus. Dedicationem vero dictae ecclesiae prout retroactis temporibus et hucusque annuatim laudabiliter peragi consuetam approbamus cupientes, ut ecclesia praedicta cum altaribus eiusdem congruis frequentetur honoribus et a Christi fidelibus jugiter veneretur et decenter muniatur et ut fideles Christi postea libentius devotionis causa confluant, ad eandem quoque ibidem caelestis dono gratiae sese uberius conspexerint esse refectos, nos de omnipotentis dei misericordia ac beatorum Petri et Pauli apostolorum auctoritate confisi omnibus et singulis utriusque sexus Christi fidelibus vere poenitentibus et confessis, qui dictam ecclesiam et altaria eiusdem in nativitatis, resurrectionis et ascensionis domini nostri Jesu Christi et pentecostes, singulis gloriosae virginis Mariae, circumcisionis, trium regum, trinitatis et corporis Christi, omnium sanctorum, omnium apostolorum nec non ipsius ecclesiae patrociniorum et dedicationis festivitatibus devote visitaverint et ad reparationem, conservationem, munitionem, augmentationem eiusdem nec non calicum, librorum homiliariorum et aliorum ornamentorum ecclesiasticorum divino cultui in ibi meliorem manus suas promptius porrexerint adiutrices, de quolibet festorum praedictorum quadraginta dies criminalium et octoginta venialium peccatorum disiunctis eis poenitentiis misericorditer in domino relaxamus futuris perpetuis temporibus duraturis. In quorum fidem et testimonium praesentes literas fieri nostrique sigilli pontificalis appensione iussimus et fecimus muniri. Datum et actum anno die et loco praenotatis.

Source Fulltext: FRIESS, Ardagger (AÖG 46, 1871) S. 555-556